Zgjedhjet e pjesshme lokale, gara mes Bashës dhe Berishës dhe aleatët në mes
Mes Lulzim Bashës dhe Sali Berishës po futet një tjetër faktor po aq i rëndësishëm për nga vetë specifika e zgjedhjeve të pjesshme lokale, aleatët.
Ata të cilët Lulzim Basha nuk i ka telefonuar qysh prej 25 Prillit, (disa prej tyre të qejfmbeture edhe para zgjedhjeve parlamentare), po miklohen së fundmi nga të dyja kahet.
Në këtë drejtim ka ecur me shpejtësi Sali Berisha i cili ditët e fundit ka intensifikuar kontaktet me partitë aleate në zyrën e tij të punës.
E konfirmoi një prej tyre, Agron Duka, i cili tha se po mendohet për ftesën duke mos përjashtuar mundësinë e një koalicioni me një pjesë të PD-së, ndërsa Pollo e tha shkoqur se po bisedohet konkretisht për logon dhe siglën.
“...Çështja e kandidatit tonë do të zgjidhet me shpalljen e marrëveshjes pas 2-3 ditësh me një front më të gjerë opozitar. Kjo marrëveshje do të përcaktojë edhe siglën edhe emrin e koalicionit dhe detaje të tjera që janë teknike. Po të ishin zgjedhje për këshillat bashkiakë nuk do kishim ndonjë debat në këtë studio. Ne kemi një zgjedhje që është mazhoritare dhe që edhe 5 vota po të heqin rrezikon mandatin e kryetarit të bashkisë...”, tha Pollo
Që do të thotë se varianti më i mundshëm i kandidatëve nga Komisioni i Rithemelimit është se do të dalin në fletën e votimit nën siglën e një koalicioni, një zgjidhje kjo edhe për tu përfshire dhe numëruar në fund të fundit nga komisionerët, që përfaqësojnë me parti në Kuvend si LSI.
Në anën tjetër, Basha ka mbetur pas me këtë skeme, por Jorida Tabaku përmendi për herë të parë të enjten edhe aleatët dhe rolin e tyre në zgjedhjet e pjesshme lokale.
E pyetur nga media se çfarë po bëhet me garën për kandidatët që do të garojnë për drejtimin e gjashtë bashkive, Tabaku u përgjigj: “Kandidatët do shpallen shumë shpejt e brenda afatit të përcaktuar nga KQZ.
PD është e angazhuar që në këtë proces të krijojë një aleancë të jashtëzakonshme dhe të gjerë me të gjithë partitë aleate të koalicionit opozitar së pari dhe së dyti një aleancë me qytetarët”