Vdekja e 3-vjeçares në spital, mjeku nën hetim për neglizhencë në trajtim
Policia e Elbasanit dhe Prokuroria kanë nisur hetimet për neglizhencë në trajtimin shëndetësor ndaj mjekut të turnit, për vdekjen e vajzës 3-vjeçare dy ditë më parë në spital. Edhe pse familjarët nuk ngritën asnjë pretendim për neglizhencë të mjekëve, por kërkuan sqarimin për shkaqet, hetimet e policisë kanë vërtetuar të kundërtën. Gentian alla, ditën kur vajza ka shkuar në spitalin rajonal, e që më pas ndërroi jetë, ka qenë mjekë roje dhe sipas uniformave blu, dyshohet se nuk i ka dhënë ndihmën e duhur mjekësore. Mjeku vetë është shprehur gjatë verifikimeve paraprake se ka kryer çdo veprim sipas protokollit mjekësor dhe nuk ka pasur mjekim të pakujdesshëm. Hetimi ndaj tij do bëhet në gjendje të lirë. Burime policore bënë me dije se 47-vjeçari është vënë në hetim për veprën penale “neglizhenca në trajtimin mjekësor”.
“Nga specialistët për Hetimin e Krimit në Komisariatin e Policisë Elbasan, u procedua penalisht për veprën penale “neglizhenca në trajtimin mjekësor”, shtetasi G. a., 47 vjeç, banues në Elbasan, me detyrë mjek në Spitalin Rajonal Elbasan, pasi ditën e djeshme është dërguar në spital, në gjendje të rëndë për jetën, një shtetase e mitur 3 vjeçe, e cila pas disa orësh dyshohet se ka ndërruar jetë për shkak të neglizhencës në trajtimin mjekësor”, thuhet në njoftimin zyrtar.
Vajza me inicialet, a.i., ndërroi jetë të hënën 17 janar, e ndërsa në spital kishte shkuar një javë më parë, e që sipas babait të vajzës, mjeku i kishte thënë se 3-vjeçarja ishte me virozë dhe i kishte dhënë disa ilaçe.
“E çova për vizitë, më tha mjeku; virozë. Më dha një qese me ilaçe e ikëm në shtëpi. Dje u bë keq, filloi t’i nxihej buza. E solla në spital, i bënë dy bidonë me serum, por goca vdiq”, tha babi i vajzës një ditë më parë.
Nga të dhënat paraprake dyshohet se shkak i vdekjes është ftohja e rëndë, referuar edhe deklaratës së bërë më herët nga shefja e Pediatrisë në Spitalin e Elbasanit, irena Palloshi, ku tha se dyshohet se kemi të bëjmë me “Pneumonia bilaterale”, (infeksion tek të dyja mushkëritë)
dhe “Insufiçence respiratore akute”. Gjithsesi do të priten edhe rezultatet e ekspertizës mjeko-ligjore, verifikimi i kartelës, recetës së ilaçeve, rezultateve të analizave mjekësore gjatë vizitës dhe
protokolli i trajtimit që është ndjekur. Familja hodhi dyshime për procedurat e ndjekura, pasi u cilësua virozë dhe u dhanë ilaçe që në fund nuk u konkluduan me shërim, por me fatalitet.