Rënia e temperaturave, MAS mbyll shkollat për tre ditë!
“Kemi marrë një vendim të rëndësishëm që lidhet me procesin mësimor të shkollave tona në fillim të javës së ardhshme. Sipas parashikimeve meteorologjike, në ditët në vijim priten temperatura tepër të ulëta, të cilat janë temperatura të jashtëzakonshme për një vend si i yni. Madje në disa zona do të arrijë deri në – 17 gradë celsius. Për këtë arsye, duke qenë se prioriteti ynë absolut në çdo kohë është shëndeti dhe mirëqenia e fëmijëve tanë, kemi vendosur që shkollat të mbyllen javën e ardhshme, nga dita e hënë deri të mërkurën, dhe orët e humbura do të zëvendësohen në vijim pas një njoftimi të dytë në bashkëpunim me zyrat vendore arsimore”, deklaroi dje ministrja e Arsimit, Evis Kushi.
Ministria e Arsimit Sportit dhe Rinisë i paraprin të ftohtit, mbyll shkollat javës së ardhshme. Kundrejt rënies së ndjeshme të temperaturave të parashikuara për ditët në vijim, dikasteri i Arsimit ka marrë vendim për mbylljen e shkollave për tre ditë me radhë në nisje të javës që vjen. Ka qene vetë ministrja e Arsimit, Evis Kushi që ka bërë publik urdhrin për pezullimin e mësimit në të gjitha shkollat e arsimit të detyruar 9-vjeçar dhe gjimnaze përgjatë datëve 24-26 janar. Urdhri tashmë u është komunikuar të gjitha institucioneve të arsimit parauniversitar, të cilat do të marrin masat e duhura për zbatimin e tij. Ndërkohë që orët e humbura të mësimit do të zëvendësohen në një moment tjetër.
“Dua t’ju njoftoj se në MAS kemi marrë një vendim të rëndësishëm që lidhet me procesin mësimor të shkollave tona në fillim të javës së ardhshme. Sipas parashikimeve meteorologjike, në ditët në vijim priten temperatura tepër të ulëta, të cilat janë temperatura të jashtëzakonshme për një vend si i yni. Madje në disa zona do të arrijë deri në – 17 gradë celsius. Për këtë arsye, duke qenë se prioriteti ynë absolut në çdo kohë është shëndeti dhe mirëqenia e fëmijëve tanë, kemi vendosur që shkollat të mbyllen javën e ardhshme, nga dita e hënë deri të mërkurën, dhe orët e humbura do të zëvendësohen në vijim pas një njoftimi të dytë në bashkëpunim me zyrat vendore arsimore”, sqaroi ministrja Kushi në njoftimin e bërë nëpërmjet rrejtit social.
Sipas saj, ky vendim mund të rishikohet nëse parashikimet nuk do të dalin të sakta dhe temperaturat do të jenë më të pranueshme për të lejuar zhvillimin e procesit mësimor. Më tej ministrja u ka bërë thirrje prindërve që të marrin masat e duhura për fëmijët e tyre, në mënyrë që t’i kapërcejnë sa më lehtë këto ditë të vështira të dimrit. Mungesa e ngrohjes nëpër shkolla është një problematikë e theksuar me të cilën përballen pjesa dërrmuese e institucioneve të arsimit parauniversitar në vend prej vitesh të tëra.
Duke nisur nga dita e sotme dhe deri në fund të javës pritet që i ftohti polar të mbërthejë Shqipërinë duke sjellë temperatura shumë të ulta. Rënia e ndjeshme e temperaturave do të vijojë edhe përgjatë javës së ardhshme, ku temperaturat më të ulta do të jenë rreth ditës së mërkurë dhe të enjte veçanërisht në zonat malore, teksa edhe bregdeti edhe zonat e ulta parashikohet të kenë temperatura disa gradë nën zero.
Krahas të ftohtit edhe pandemia e Covid-19 ka vënë në vështirësi procesin mësimor gjatë këtij viti. Shkak për këtë janë bërë mungesat e shumta të raportuara ditë pas dite, jo vetëm në radhët e nxënësve, por edhe të vetë mësuesve, të cilët kanë rezultuar të prekur nga koronavirusi. Por, pavarësisht shifrave në rritje të rasteve të raportuara gjatë dy javëve të fundit autoritetet e shëndetit vendosën të vijonin normalisht me procesin mësimor pas pushimeve të bëra për festat e ndërrimit të viteve.
Në ligjin e arsimit parauniversitar për
caktohet se arsimi bazë i detyruar fillon në moshën 6 vjeç dhe zgjat 9 vjet. Nxënësi është i detyruar të ndjekë arsimin bazë deri në moshën 16 vjeç. Arsimi bazë është i njësuar. Institucionet e tij shtrihen në të gjithë territorin e Republikës së Shqipërisë. Shtetasit që mbushin moshën 16 vjeç, por që nuk arrijnë ta përfundojnë arsimin bazë, mund ta përfundojnë atë në shkollat me kohë të shkurtuar. Arsimi bazë përbëhet nga dy cikle: Cikli fillor, (klasa I-V) dhe Cikli i mesëm i ulët, (klasa VI-IX). Arsimimi i nxënësve me aftësi të kufizuar bëhet në shkolla speciale, në klasa speciale brenda shkollave normale ose të integruar në klasa normale. Arsimi bazë i detyruar synon të zhvillojë aftësitë intelektuale, krijuese, praktike dhe fizike të nxënësve, të zhvillojë personalitetin e tyre dhe t’i pajisë ata me elementet themelore të kulturës së përgjithshme dhe edukatën qytetare.
Ndërsa arsimi i mesëm nuk është i detyrueshëm. Ky cikël përbëhet nga gjimnazet (me kohë të plotë dhe të shkurtuar) si dhe nga shkollat e mesme profesionale. Gjimnazet publike japin një kulturë të përgjithshme që është zgjerim i njohurive e thellim i kulturës dhe njohurive të fituara në shkollat e arsimit bazë. Kohëzgjatja e gjimnazit është 3 vjet dhe përfundon me provimet e Maturës Shtetërore. Në planin mësimor janë përfshirë nëntë fusha si: Artet, Edukimi fizik dhe sportet,Gjuha e huaj (ose gjuhët e huaj), Gjuha shqipe dhe letërsia, Karriera dhe aftësimi për jetën, Matematika, Teknologjia & TIK, Shkencat natyrore dhe Shkencat shoqërore. Kurrikula e gjimnazit është e përbërë nga kurrikula bërthamë dhe kurrikula me zgjedhje. Gjimnazet me kohë të shkurtuar, shërbejnë edhe për arsimimin e të rriturve. Kohëzgjatja e studimeve në gjimnazet me kohë të shkurtuar, është 4 vjet dhe ato përfundojnë me dhënien e provimeve të Maturës Shtetërore. Plani mësimor dhe programet kurrikulare, miratohen nga Ministri i Arsimit dhe Sportit.