Covid-19\ Dje 3 viktima dhe 2383 të infektuar të rinj
Edhe tre humbje të tjera jete si pasojë e Covid-19 janë shënuar në vendin tonë përgjatë orëve të fundit. Shqetësuese vijojnë të jenë edhe infektimet ditore, ku në 24 orët e shkuara kanë rezultuar pozitivë me koronavirus 2383 qytetarë, ku në masë shpërthimi i infektimeve po shfaqet tek moshat e reja. Tirana vijon të jetë qarku me numrin më të lartë të infektuarve të rinj. E rënduar gjendja raportohet edhe sa i takon shtrimeve në spitale të cilat gjatë ditëve të fundit janë raportuar gjithashtu në rritje.
Sipas të dhënave të bëra publike nga Ministria e Shëndetësisë gjatë 24 orëve të shkuara në të gjithë vendin bëhet e ditur të jenë kryer 7,634 testime tek rastet e dyshuara, nga të cilat kanë rezultuar pozitivë me koronavirus 2,383 qytetarë, në këto bashki: 1,112 në Tiranë, 120 në Durrës, 112 Vlorë, 94 në Shkodër, 71 në Fier, 70 në Gjirokastër, 59 në Sarandë, 56 në Lushnje, 51 në Elbasan, 41 në Kamëz, Korçë, 34 në Lezhë, 33 në Pogradec, 32 në Berat, 29 në Patos, 28 në Krujë, 26 në Kuçovë, 23 Tepelenë, 22 në Kavajë, 19 në Dibër, 18 në Kurbin, 17 në Mirditë, Gramsh, 15 në Vorë, 13 në Memaliaj, 12 në Vau i Dejës, Skrapar, Prrenjas, 11 në Divjakë, Devoll, Cërrik, 10 në Pukë, Kukës, Tropojë, Mat, Peqin, 9 në Mallakastër, 8 në Fushë Arrëz, Përmet, Maliq, 7 në Malësi e Madhe, Selenicë, Librazhd, 6 në Shijak, Rroskovec, Libohovë, 5 në Rrogozhinë, Këlcyrë, Kolonjë, 4 në Has, Delvinë, 3 në Konispol, Dimal, Belsh, 2 në Klos, Himarë, Poliçan, 1 në Dropull.
Në të gjithë vendin tashmë janë 23,593 pacientë aktivë me koronavirus, ku aktualisht në spitalet Covid po marrin trajtim 134 pacientë, nga të cilët 14 janë në gjendje më të rënduar. “Në 24 orët e fundit me gjithë përpjekjet e stafit mjekësor ka tre humbje jete me SARS-COV2 pozitiv: Dy qytetarë nga Durrësi nga 73 vjeç dhe një qytetar nga Tirana 85 vjeç”, bën me dije .Ministria e Shëndetësisë dhe Mbrojtjes Sociale. Fatmirësisht i lartë raportohet të jetë edhe numri i të shëruarve. Gjatë ditës së djeshme bëhet e ditur se janë shëruar 1,754 qytetarë, duke e çuar numrin e të shëruarve në 214,633 që nga fillimi i epidemisë. Ministria e Shëndetësisë u bën apel qytetarëve të vaksinohen sa më parë, për të mbrojtur veten dhe shëndetin e të tjerëve. Çdo qytetar mbi 16 vjeç, mund të vaksinohet në qendrën shëndetësore ose në pikën më të afërt të vaksinimit të përqendruar. Vaksinimi është i hapur edhe për fëmijët mbi 12 vjeç me probleme të sistemit imunitar, me rekomandim nga mjeku. Po ashtu, qytetarët që kanë kaluar 6 muaj nga kryerja e dozës së dytë të vaksinës, të drejtohen në qendrat shëndetësore ose pikat e vaksinimit të përqëndruar, për t’u vaksinuar me dozën e tretë përforcuese. Vaksinat antiCovid reduktojnë mundësinë e infektimit dhe shmangin në shkallë të lartë hospitalizimet dhe fatalitetet. Ministria e Shëndetësisë i kujton qytetarëve se respektimi i protokolleve anticovid është domosdoshmëri për mbrojtjen e shëndetit. Vendosja e maskës është e detyrueshme në çdo ambient të mbyllur. Shmangni grumbullimet dhe ajrosni ambientet ku qëndroni, për të kufizuar përhapjen e Covid-19. Nëse dyshoni se jeni të prekur nga Covid-19 apo keni shenja të sëmundjes, izolohuni menjëherë dhe kontaktoni me mjekun tuaj të familjes për t’u testuar sa më parë ose telefononi Urgjencën Kombëtare në numrin unik 127. Zgjerohen kapacitetet laboratorike në ISHP
Gjatë vizitës së zhvilluar dje në laboratorin e referencës në Institutin e Shëndetit Publik, ministrja e Shëndetësisë, Ogerta Manastirli tha se po merren masat për përballimin e situatës së epidemisë në vend, ku aktualisht mbizotëron varianti Omicron në 95 për qind të rasteve.
“Kemi investuar për Institutin e Shëndetit Publik në raport me rritjen e kapaciteteve, të cilat vijnë të rritura me rreth 30 për qind krahasuar me ato më parë, duke rinovuar dhe shtuar flotën e pajisjeve përsa i përket aparaturave dhe gjithashtu duke kontribuar në përballimin më të mirë të situatës. I vlejnë Institutit të Shëndetit Publik, jo vetëm për PCR dhe evidentimin e koronavirusit por gjithashtu edhe për një seri agjentësh. Kjo është e rëndësishme sepse hap një gamë të analizimit të viruseve të tjera. Që do të thotë që përgatitemi dhe forcojmë kapacitetet tona, jo vetëm për t’iu përgjigjur situatës aktuale për fuqizimin e kapaciteteve, por edhe për t’i paraprirë asaj që gjithë bota sot po synon, emergjencave që mund të ndodhin në të ardhmen. Pra, të përballemi dhe të kemi një përgjigjie ndaj emergjencave të shëndetit publik”, tha ministrja Manastirliu.
Duke folur për situatën epidemiologjike, ministrja bëri me dije se në 95 për qind të rasteve të identifikuara me Covid-19, mbizotëron varianti Omicron, duke shtuar që janë 330 pika në të gjithë vendin për kryerjen e testit të antigenit. “Jemi në një situatë ku incidenca vlerësohet e rritur. Përpara dy ditësh kemi patur pikun më të lartë ndonjëherë të rasteve të infektimeve, ku siç është konfirmuar nga Instituti i Shëndetit Publik, mbi 95 për qind e rasteve sot paraqiten me variantin Omicron. Për të përballuar këtë situatë është e nevojshme testimi i shpejtë, testimi i sigurt. Ne nuk kemi ndalur në asnjë moment përpjekjet tona qoftë përsa i përket testimit të shpejtë dhe testimit nëpërmjet PCR, ndaj po rrisim kapacitetet. Kemi 330 pika në të gjithë Shqipërinë ku kryhet testi i shpejtë falas në qendrat tona shëndetësore”, deklaroi ministrja Manastirli.