Gjykata liron 3 të arrestuarit. U investuan 1 mln euro dhe fitoheshin 400 mijë euro në muaj
Shkalla e Parë e Durrësit vendosi masë të zbutur sigurie për punonjësit e 2 kompanive “Crypto World 1 dhe 2” në Fllakë dhe Shijak; Rramush Dumani, Ardian Çekiçi dhe Liserxhio Xhaferraj. 4 të tjerë ende në kërkim. Hetuesit deklarojnë se aktiviteti ishte i palicencuar dhe ilegal, shkaktohej evazion fiskal dhe dyshohet për pastrim parash. Pronari e cilësoi blof, por ka nisur hetimi pasuror burimin e parave të blerjes së pajisjeve. U sekuestruan qindra aparatura e pajisje për kriptovalutën
Gjykata e durrësit la dje të lirë pas tre ditësh paraburgimi, 3 të arrestuarit për laboratorin e kriptomonedhës BitCOiN, në një ambient të marrë me qira, në fshatin Pjesëz të Shijakut. Rramush dumani, ardian Çekiçi dhe Liserxhio Xhaferraj, të akuzuar për aktivitet ilegal në prodhimin e kriptovalutës, do të hetohen në gjendje të lirë nga Prokuroria. Vendimi u morr nga gjyqtarja Flora Hasimi, e cila vendosi “detyrim paraqitjeje”, ashtu edhe siç ishte paralajmëruar nga administratori i kompanisë, që e cilësoi një “aksion blof” të policisë vendore.
Gjykata e konsideroi aksionin deri diku të ligjshëm, por jo sa për të mbajtur në paraburgim të dyshuarit, që nga ana tjetër prezantuan dokumentacionin e ligjshëm për aktivitetin dhe alibinë se në Shqipëri biznesi i prodhimit të kriptomonedhave nuk është i ndaluar. Laboratorët u gjetën në fshatrat Pjesëz dhe Shijak, teksa të dyshuarit e ndaluar janë punonjës të mirëmbajtjes së pajisjeve, vlera e të cilave e investuar, shkonte deri në 1 milion euro.
Ndryshe nga rastet e tjera të prodhimit të kriptomonedhave në vend, këta persona nuk vidhnin energji elektrike, por rrymën e nevojshme e siguronin nëpërmjet paneleve diellore. Sipas Policisë, ata kishin kërkuar të regjistronin aktivitetin e tyre, por nuk ishin legalizuar, pasi autoriteti i Mbikëqyrjes Financiare nuk i kishte lejuar. Pronari i pretendoi se kishte kryer zhdoganimin e pajisjeve, kishte marrë leje për aktivitet dhe dokumentacion.
Gjatë operacionit, Policia sekuestroi 631 copë pajisje elektronike për prodhimin e kriptovalutave, 630 copë panele diellore, 360 copë pajisje elektronike për sigurimin e vazhdueshëm të energjisë elektrike, 71 copë pajisje kompjuterike për procedimin e të dhënave, 71 copë pajisje kompjuterike për ruajtjen e përkohshme të të dhënave, 71 copë hard-disqe të jashtme, 71 copë pajisje elektronike për stabilizimin e temperaturave, pajisje elektronike për shpërndarjen e internetit, pajisje kompjuterike të lëvizshme dhe dokumente të ndryshme të subjekteve, fatura financiare, shënime të ndryshme etj. ato i përkisnin kompanive “Crypto World 1” dhe “Crypto World 2”.
Llogaritej se nga aktiviteti mujor, kompanitë mund të nxirrnin një fitim apo xhiro deri në 400 mijë euro. Burime nga grupi i hetimit thanë se ngritja e laboratorëve ka nisur në muajin nëntor dhe në muajin dhjetor ata kanë qenë në gjendje pune me kapacitet të plotë. Sipas një përllogaritje të ekspertëve (pjesë e grupit të hetimit), vetëm në harkun e 40 ditëve, të dy laboratorët kanë arritur të prodhojnë afro 400 mijë euro fitime. Personat e implikuar në këtë aktivitet pretendojnë se po zhvillonin një aktivitet të ligjshëm, por autoritetet e zbatimit të ligjit thonë se nuk mund të jetë i ligjshëm një aktivitet vetëm me regjistrimin në (QKB), Qendrën Kombëtare të Biznesit, pa u riregjistruar ndër të tjera edhe në (QKR), Qendrën Kombëtare të Regjistrimit, ç’ka do të thotë se kemi të bëjmë me një biznes pa licencë. ato nuk janë të regjistruar në tatime, duke kryer kështu evazion fiskal.
“Nuk është problem fare energjia elektrike, këtë ata e paguajnë pa problem. Po pjesa tjetër është komplet e jashtëligjshme. Ata justifikohen me faktin se në vendin tonë nuk ka asnjë dispozitë në Kodin Penal ku parashikon ndalimin e prodhimit të BitCOiN apo kriptomonedhave të tjera. Pra, thonë që nuk është e jashtëligjshme, por nuk kemi as një depozitë ligjore që e lejon. asnjë aspekt i veprimtarisë së këtyre shtetasve nuk është i qartë për sa u përket aseteve të kompanisë, zhvillimit të aktivitetit, deklarimit të fitimit, futjes së të dhënave kompjuterike me qëllim përfitimin monetar etj.”, thanë burime nga grupi hetimor për çështjen në fjalë.
Për operacionin janë ende në kërkim të dyshuarit E. H., M.Gj., E.H. dhe th.Z., banues në tiranë. Policia po heton edhe burimin e të ardhurave të shpenzuara për ngritjen e këtyre dy laboratorëve, vlerë e cila arrin në 1 milion euro. Katër janë veprat penale të konsumuara nga personat e përfshirë në këtë aktivitet të paligjshëm: “mashtrimet kompjuterike”, “ushtrimi pa licencë i veprimeve financiare”, “fshehja e të ardhurave” dhe “pastrimi i produkteve të veprës penale”
administratori Enxhi Hasani, hodhi poshtë akuzat se kanë veprimtari ilegale te kompania në fjalë. ai e konsideroi blof reagimin e Policisë, ndërsa thekson se rastet që janë zbuluar dhe ndjekur penalisht kanë të bëjnë me vjedhjen e energjisë elektrike, evazion fiskal apo futjen kontrabandë të pajisjeve kompjuterike.