KLSH kallëzon 8 zyrtarë të Kadastrave në Lushnjë dhe Berat, akuzohen se legalizuan objekte informale. Katër janë ish-drejtorë dhe dy përgjegjësa sektori
Kontrolli i Lartë i Shtetit kallëzoi në Prokurorinë e Lushnjës 5 zyrtarë të Kadastrës, që akuzohen për shpërdorim detyre. KLSH sqaroi dje me një njoftim zyrtar se ka zhvilluar auditimin me objekt “mbi procedurën e pranimit dhe administrimit të dokumentacionit, për regjistrimin e pasurive të paluajtshme dhe auditimin e ligjshmërisë dhe përputhshmërisë, në kryerjen e procedurave të legalizimit për periudhën e funksionimit”, në Drejtorinë
Vendore të Agjensisë Shtetërore të Kadastrës (DVASHK) Lushnjë. “Nga ky auditim janë konstatuar një sërë veprimesh dhe/ose mosveprimesh të ndërmarra nga ana e ish-drejtorit të ALUIZNIT, Drejtoria Rajonale Lushnjë, ish-drejtorit të DVASHK Lushnjë, një Përgjegjës Sektori dhe dy specialistë në DVASHK. Këto (mos) veprime të kryera në kundërshtim me ligjin dhe aktet nënligjore që normojnë detyrën e tyre funksionale, kanë sjellë si pasojë dëmtimin e rëndë të interesave të ligjshme të shtetit dhe/ose personave të tretë”, theksohet në njoftim. Për këtë shkak, Kontrolli i Lartë i Shtetit ka depozituar në Prokurori kallëzimin penal, për veprën “shpërdorimi i detyrës”. KLSH njoftoi se ka kallëzuar gjithashtu në Prokurorinë e Beratit edhe 3 funksionarë të Drejtorisë Vendore të ALUIZNIT, po për të njëjtën akuzë. “Në zbatim të programit të auditimit nr.536/1, datë 14.05.2021, i ndryshuar, ka zhvilluar në subjektin Drejtoria Vendore e Agjencisë Shtetërore të Kadastrës (DVASHK) Berat, auditimin për ligjshmërinë në kryerjen e procedurave të legalizmit të objekteve informale. Nga auditimi janë konstatuar një sërë shkeljesh të kryera nga ana e dy ish-drejtorëve dhe një punonjësi me detyrë ish Regjistrues, që kanë konsumuar elementë të veprës penale.