Ulsi Manja shkrin Kadastrën e Durrësit: Vepronin si çetë kaçakësh!
Ministri i Drejtësisë njoftoi se pas një raporti-kontrolli, u gjetën shkelje nga më të ndryshmet, ndaj ka referuar për shkarkim nga detyra të gjithë zinxhirin, nga drejtori tek specialisti më i thjeshtë. Ankesa dhe denoncime të shumta. Manja: “Kadastra e Durrësit të shkrihet totalisht. Shkelje flagrante të ligjit! Sinkronizim perfekt nga drejtori te nëpunësit, i kallëzuam në Prokurori”. Denoncohen edhe 2 ish-drejtorë, 2 ish-përgjegjësa dhe një specialist të ALUIZNIT Sarandë, shkak ndërtimet pa leje
Shkeljet e shumta ligjore dhe skandalet ku është përfshirë ndër vite, po çojnë në një nga vendimet më ekstreme institucionet qeveritare. Ministria e drejtësisë njoftoi se do të shkrijë agjencinë Shtetërore të Kadastrës në durrës. Ministri Ulsi Manja, në një komunikim me mediat dje, u shpreh se bëhet fjalë për një koordinim perfekt e të gjithë administratës atje në shkelje të ligjit, duke filluar nga drejtori dhe deri te çdo nëpunës. Sipas ministrit, janë 210 dosje me probleme që janë marrë në hetim nga Njësia antikorrupsion, gjatë periudhës gusht-tetor 2021.
“Fillojmë me drejtorinë Vendore të agjencisë Shtetërore të Kadastrës në durrës. Që në fillim të herës po them se kemi çuar si masë për shkarkim nga detyra, pothuajse të gjithë drejtorinë, pra praktikisht kemi referuar shkrirjen e saj, duke filluar nga; Drejtori i DVASHK Durrës, tek Përgjegjësi i sektorit të legalizimeve, Përgjegjësi i sektorit të Hartografisë dhe Rregjistrimit, Specialisti i sektorit të Hatografisë dhe Regjistrimit, Përgjegjësi i sektorit të Kalimit të Pronësisë, si dhe 10 Specialistë të tjerë të kësaj drejtorie. Janë 215 dosje për legalizim objektesh që janë marrë në shqyrtim nga inspektorët tanë, ku ka rezultuar se në këto dosje mungonin pothuajse totalisht dokumentacionet më të rëndësishme. Një praktikë pune totalisht abuzive dhe fiktive, pa vetëdeklarime për legalizim nga subjektet, pa akte evidentimi në terren, pa kartelë të pasurisë apo statusit juridik, pa harta treguese, pa ortofoto, etj shkelje”, tha Manja. Ministri shpjegoi më tej se kjo Kadastër, nga drejtori te specialistët, vepronin si “çetë kaçakësh”, duke abuzuar me punë dhe dokumentet për legalizimin e subjekteve. Manja tha se janë përgatitur kallëzimet penale për personat e përfshirë në shpërdorimin e detyrës, ndërsa tha se vetëm për hetimet 3 mujore është përgatitur në raport prej 386 faqesh, për legalizimet e kryera nga ASHK Durrës, që janë me probleme. “Për mua është një guxim i madh, një kompani e gjithë në shkelje, nga drejtori deri tek specialistët, të sinkronizuar si çetë kaçakësh me rroga shtetërore e në mall të qytetarëve shqiptarë. drejtoria antikorrupsion ka tërhequr dosje dhe ka nisur kontrollet, DVASHK e Durrësit është përpjekur të ribëjë dosjen, duke e plotësuar me të dhëna të ndryshuara. Kjo gjë e rëndon akoma më shumë, pasi institucioni që është objekt kontrolli, nuk mund të bëjë asnjë riformulim të akteve të vëna të dispozicion të grupit të inspektimit”, sqaroi Manja.
Ministri foli edhe për dy raste të ndryshme të abuzimit në Kadastrën e Sarandës, duke legalizuar objekte kundër vendimit të gjykatës. Për këto dy raste Manja tha se janë kallëzuar në Prokurori ish-drejtorin dhe ish-përgjegjësin e sektorit të legalizimeve të aLUiZNi-t Sarandë dhe ish-drejtori bashkë me ishpërgjegjësin dhe ish-specialistin e sektorit të legalizimeve të drejtorisë Rajonale të aLUiZNi-t Sarandë. “Në rastin e parë, pavarësisht vendimit të gjykatës
Gjirokastër për pezullimin e procesit të legalizimit dhe kthimin në gjendjen fillestare të situatës, DVASHK ka vijuar me legalizimin e objektit dhe pajisen me lejen përkatëse. Jo vetëm kaq, por krejt si në mall pa zot, objekti i legalizuar rezulton se nuk i plotëson kriteret urbanistike të parcelizimit dhe ndërtimit sipas studimit të miratuar, duke zënë me ndërtim pjesërisht sipërfaqe të 4 parcelave ndërtimore, si dhe duke zënë rrugën e parashikuar nga studimi urbanistik. të gjitha këto janë qartësisht kritere që përjashtojnë legalizimin. Rasti i dytë është sërish një kundërvënie ndaj një vendimi gjykate për sigurimin e masës së padisë mbi një objekt, por me sa duket zotërinjtë e këtyre agjencive e ndjejnë veten edhe mbi gjykatat, ndaj kanë vazhduar hesapet e tyre duke i dhënë qytetarit S.d., lejen e legalizimit, pavarësisht se godina e legalizuar prekte infrastrukturën rrugore”, tha Manja. denoncimet e bëra në drejtorisë antikorrupsion në Ministrinë e drejtësisë në periudhën nëntor-dhjetor 2021 janë 200, nga të cilat janë kryer 11 kallëzime dhe janë vendosur 48 masa administrative.