Vrasja e ish-policit Santiago Malko, 25 vite burgim për Blendi Tetën
Përfundon procesi për të pandehurin e parë, të atentatit të bujshëm të vitit 2019 te “Xhamlliku”. Teta mohoi përfshirjen, por tabulatet telefonike zbuluan se ishte vëzhguesi i lëvizjeve të ish-efektivit dhe sinjalizoi të tjerët. Përgjegjësia për krimin iu vesh “Klanit Duka”, që vepron në aksin Tiranë-Vlorë, motiv hakmarrja dhe lufta për territorin dhe kontrollin e narkotrafikut. Ende 8 persona të tjerë në kërkim
Gjykata e Posaçme dënoi me njëçerek shekulli burgim të pandehurin e parë për atentatin ku mbeti i vrarë ish-polici Santiago Malko. Procesi u mbyll pothuajse tre vite pas ngjarjes dhe nisjes së hetimeve, teksa i akuzuari Blendi teta, i arrestuar pak javë pas ngjarjes, nuk e ka pranuar asnjëherë bashkëpunimin në krim me organizatën “duka”. Gjykata pranoi provat e SPaK dhe shpalli fajtor tetën, duke e dënuar përfundimisht me 25 vite izolim ditën e djeshme, që nis që nga momenti i ndalimit të të pandehurit. Pretendimet e tetës se nuk është i përfshirë në krim, janë hedhur poshtë nga gjykata, pasi si provë e fortë janë tabulatet telefonike, prezenca e tij në vendngjarje dhe disa fakte analizash të adN-së.
Në këto përgjime telefonike është vërtetuar se teta kishte patur rol në mbajtjen nën vëzhgim të Santiago Malkos, me qëllim që të gjendej një moment i përshtatshëm për ta qëlluar. Për vrasjen e Malkos akuzohen edhe 8 persona të tjerë, të shpallur që prej një viti në kërkim, të cilësuar si pjesë e një grupi të fuqishëm narkotrafiku në Shqipëri dhe jashtë saj, i njohur si “Klani duka”, me bazë kryesore aksin Vlorë-tiranë. E më konkretisht; vëllezërit Leonard duka dhe Erlis duka, ilir Selmani, Oltian Loga, Fatmir Hyseni (doqja), dritan agaj, aleksandër Maxhaku dhe Xhoni Nica, te cilët janë ndarë në gjykim nga teta.
Mbrëmjen e 27 gushtit 2019, në zonën e “Xhamllikut” u ekzekutua me breshëri plumbash Santiago Malko. Viktima, një ish-punonjës policie i larguar nga detyra, pasi u arrestua pas një sherri për lojërat e fatit, ishte një emër jo pak i njohur për autoritetet, i dyshuar si i përfshirë në disa ngjarje të rënda kriminale, në aksin tiranë-Vlorë, për shkak të aktiviteteve të paligjshme. Emri i tij do të dilte në skenë në muajin tetor të vitit 2018, ngjarje kjo kur i plagosur mbeti miku i tij Ervis Martinaj, por u lirua për mungesë provash. Pista kryesore për atentatin ka qenë hakmarrja, por edhe larja e hesapeve për prishje të pazareve të drogës dhe lufta për territor dhe kontroll të biznesit ilegal.
Malko shikohej si rival në këtë çështje dhe duket se grupi kundërshtar ka planifikuar prej kohësh ndjekjen dhe eleminimin e tij. ditën e ngjarjes, organizata ka drekuar e gjitha në një restorant të njohur në afërsi të zonës së dajtit.