Pas dënimit të Luan Dacit, një tjetër anëtar i KPA-së denoncohet nga SPAK për falsifikim dokumentesh

Prokuroria e Posaçme Antikorrupsion ka marrë së fundmi nën hetim, një tjetër anëtar të Kolegjit të Posaçëm të Apelimit. Burime nga SPAK konfirmojnë se nën hetim është vënë Ardian Hajdari, për akuzën e “falsifikimit të dokumenteve”, e njëjta me atë që largoi nga detyra dhe dënoi ish-magjistratin Luan Daci. Hajdari është kallëzuar penalisht në muajin qershor 2020 nga ish-magjistratët Antoneta Sevdari, Elsion Sadiku dhe Ervin Metalla, pra në të njëjtën kohë me Dacin. Ish-magjistratët e shkarkuar nga Vettingu apeluan vendimin dhe kërkonin rikthimin në detyrë, me argumentin se anëtari Daci që kishte aprovuar ndëshkimet, ishte me precedentë. Daci u dënua me 6 muaj burg konvertuar në një vit shërbim prove dhe kushtin që mos ushtrojë funksione publike, në të trija shkallët. Para Komisionit Ad-Hoc të Kuvendit, Hajdari në CV-në e tij, ka deklaruar se ka ushtruar profesionin e avokatit nga viti 2002-2004 dhe nga viti 2006 e në vazhdim. Pra, për 13 vite, pasi përvoja tjetër profesionale si jurist në Hidrocentralin e Komanit dhe Bashkinë e Vaut të Dejës, nuk përfshihet në grupin e profesioneve të parashikuara në ligj. Denoncuesit pretendojnë se Hajdari ka gënjyer dhe ka deklaruar të dhëna të pavërteta në Kuvend kur ka thënë se ka ushtruar profesionin e avokatit për 17 vite, në një kohë kur nuk mund të punonte jurist në administratë dhe njëkohësisht të ushtronte profesionin e avokatit. Denoncuesit e kanë kallëzuar dhe për “fshehjen e të ardhurave”, pasi ai është regjistruar për herë të parë në organet tatimore për të ushtruar profesionin e avokatit, në prill të 2007-ës.