Kushtetuesja shtyn për të enjten vendimin për shkarkimin e Metës
Seanca maratonë e Gjykatës Kushtetuese për shkarkimin e Presidentit Ilir Meta u mbyll pa një vendimmarrje. Vazhdimi i saj u shty për paraditen e së enjtes, ku pas një dite të ngarkuar me përplasje mes Presidencës nga njëra anë dhe vetë Kushtetueses dhe Kuvendit nga ana tjetër.
Presidenca kërkoi përjashtimin e të gjithë trupës së Gjykatës Kushtetuese nga shqyrtimi i kësaj çështjeje me arsyetimin se anëtarët e kësaj gjykate ishin në konflikt interesi dhe kushte papajtueshmërie për vendim.
Në kërkesën e dorëzuar në Kushtetuese, Meta tha se gjashtë nga shtatë anëtarët që ka aktualisht kjo gjykatë janë në konflikt interesi, pasi janë zgjedhur përkatësisht nga Presidenti dhe Kuvendi, dy organet që janë përfshirë në këtë konflikt gjyqësor. Ndërkohë, për Vitore Tushën, njëkohësisht kryetare e Gjykatës Kushtetuse, Presidenca thekson se asaj i ka përfunduar mandati prej pesë vitesh tashmë.
“Gjykata Kushtetuese, përbëhet sot nga 7 anëtarë – 6 prej të cilëve janë emërtesë/ zgjedhur pikërisht nga institucionet në këtë konflikt gjyqësor (Kuvend-President), ndërsa anëtari i shtatë – Kryetari, është i zgjedhur nga të dy organet President-Kuvend, që prej vitit 2008, dhe që sot është në vitin e 5-të, të ushtrimit të detyrës, përtej mandatit 9-vjeçar kushtetue dhe në pritje të gjyqtarit zëvendësues”, thuhet në kërkesën e Presidencës.
Më pas, duke u ndalur në emra konkretë të anëtarëve, Presidenca theksoi përplasjen me Fiona Papajorgjin, të cilën e ka paditur në Kolegjin e Posaçëm të Apelimit për shkelje të rënda të ligjit të funksionimit të
Gjykatës Kushtetuese.
Në lidhje me anëtarin Përparim Kalo, Presidenca kujton se atij i përfundon mandati dhe Kuvendi ka hapur thirrjen për plotësimin e kësaj vakance. Për të kundërshtuar pjesëmarrjen e Kalos në këtë gjykim, Presidenca citon në kërkesën e saj një shkrim të publikuar nga anëtari i Gjykatës Kushtetuese në media. Në këtë shkrim, Kalo thotë se Shqipëria është i vetmi vend ku zëvendësuesve të anëtarëve që largohen para përfundimit të mandatit nga Gjykata Kushtetuese nuk u jepet mandat i plotë 9-vjeçar, por vetëm pjesa e mbetur e mandatit të lënë përgjysmë. Ai kërkon mes rreshtave që Kuvendi të rishikojë mundësinë e ndryshimit të ligjit.
Për Presidencën, si i zgjedhur nga Kuvendi ky shkrim i Përparim Kalos është ftesë që atij dhe anëtarit tjetër, Altin Binaj t’u zgjatet mandati në Kushtetuese si anëtar me mandat të plotë, çka bie në konflikt interesi, sipas këndvështrimit të Presidencës.
Gjykata Kushtetuese rrëzoi këtë kërkesë të Presidentit Ilir Meta. Kushtetuesja tha se vendimi për të rrëzuar kërkesat e Presidentit ishte unanim dhe asnjëri prej gjyqtarëve nuk u tërhoq nga shqyrtimi i çështjes së ngritur kundër tij. Sipas deklaratës së Gjykatës Kushtetuese kërkesat për shpalljen e papajtueshmërisë dhe konfliktit të interesit për të shtatë anëtarët e saj është e pabazuar.
Seanca vijoi, ku Presidenca tha se i gjithë procesi i nisur nga Kuvendi për shkarkimin e Metës ishte në shkelje të rënda proceduriale, ndërsa vetë Kushtetuesen e akuzoi se kishte shkelur afatin 3-mujor për marrjen në shqyrtim të kësaj çështjeje.