Akti final për Metën, tërhiqet Kushtetuesja: Vendimi i arsyetuar brenda 30 ditëve

Presidenti Meta, edhe në këtë seancë nuk ishte i pranishëm, por u përfaqësua nga këshilltari i tij ligjor, Bledar Dervishaj. Ndërkohë, nga Kuvendi, në Kushtetuese u paraqitën kryetarja e Komisionit të Ligjeve, Klotilda Bushka dhe kreu i grupit parlamentar socialist, Taulant Balla

Në Gjykatën Kushtetuese u luajt këtë të hënë akti final i gjyqit për shkarkimin e Presidentit Ilir Meta. Kuvendi dhe Presidenca dorëzuan për shtatë anëtarët përgjigjet përkatëse për 72 pyetjet që gjykata i bëri në seancën e së enjtes, si dhe dhanë argumentimet përfundimtare përkatëse.

Pas këtij procesi, Gjykata u tërhoq për vendim, duke njoftuar se ky vendim do të jepet brenda një afati kohor prej 30 ditësh. Socialistët kërkuan heshtje përgjatë kësaj periudhe.

“Ne duhet të respektojmë pavarësinë e vendimmarrjes së Gjykatës Kushtetuese. Nga momenti i përfundimit të procesit të gjithë kemi detyrimin, përfshirë Presidentin e Republikës, deri sa Gjykata Kushtetuese brenda afatit 30-ditor të shprehet”, tha kreu i grupit parlamentar të PS-së, Taulant Balla, duke shtuar se ky ka qenë një proces shumë i mirë dhe i shëndetshëm kushtetues për cilësinë e demokracisë në Shqipëri.

Presidenti Meta edhe në këtë seancë nuk ishte i pranishëm, por u përfaqësua nga këshilltari i tij ligjor, Bledar Dervishaj. Ndërkohë, nga Kuvendi në Kushtetuese u paraqitën kryetarja e Komisionit të Ligjeve, Klotilda Bushka dhe kreu i grupit parlamentar socialist, Taulant Balla.

Përfaqësuesit ligjorë të presidentit u mbrojtën duke kundërshtuar të gjithë procedurën që ishte ndjekur nga Parlamenti i kaluar për ngritjen e komisionit hetimor për shkarkimin e Presidentit.

Sipas tyre, Presidentit të Republikës iu mohua e drejta për t’u dëgjuar në Parlament para se të merrej vendimi për ngritjen e komisionit hetimor dhe se ky komision u ngrit në shkelje të afateve ligjore. Përfaqësuesit e kreut të shtetit cituan përcaktimin e Kushtetutës se Kuvendi nuk mund të kryejë asnjë hetim parlamentar në 4 muajt e fundit të mbarimit të mandatit.

Presidenca e nisi mbrojtjen duke kërkuar përjashtimin e të gjithë trupës gjykuese me pretendimin se ishin në konflikt interesi dhe kushte papajtueshmërie për të vendosur për këtë çështje. Kërkesa u rrëzua si e pabazuar nga ana e Gjykatës Kushtetuese.