Kryeprokurori Çela dhe ministri Manja takohen për fatin e Drejtësisë: Përshtatje propozimit për hartën gjyqësore, lidhje më e fortë për çështjet e letër-porosive

Harta e re gjyqësore ka shkaktuar jo vetëm pakënaqësi të qytetarëve, por edhe kritika dhe mosdakordësi nga ekspertët juridikë, kryesisht Dhomat e Avokatëve në të gjithë vendin.

Ata kërkojnë rishikimin e planit të qeverisë dhe organeve të reja të drejtësisë, për të mos i munduar qytetarët në ecejake pa fund në procese penale, administrative dhe civile. Për këtë shkak, dje janë takuar dy nga zyrtarët më të lartë të institucioneve. Prokurori i Përgjithshëm, Olsian Çela dhe ministri e Drejtësisë, Ulsi Manja, pas një takimi që patën sot në Prokurorinë e Përgjithshme, mendojnë se nevojitet një ripërshtatje e propozimit për hartën e re gjyqësore. Ata diskutuan në parim për hartën e re gjyqësore, e cila është në fazën e konsultimeve me grupet e interesit dhe vlerësuan domosdoshmërinë për përshtatjen e saj me nevojat që ka sot sistemi i Prokurorisë. Në takim, Manja dhe Çela diskutuan edhe çështjet që lidhen me koordinimin e punës mes dy institucioneve, në prag të përgatitjes së rekomandimeve prioritare të Këshillit të Ministrave, në luftën kundër kriminalitetit për vitin 2022.

Drejtuesit e dy institucioneve ranë dakord të bashkërendojnë punën, për ndërlidhjen e sistemeve të marrëdhënieve juridiksionale me jashtme, të cilat operojnë Ministria e Drejtësisë dhe Prokuroria e Përgjithshme, sa i takon ekzekutimit të letër-porosive, për pastrimin e produkteve të veprës penale. Harta e re gjyqësore është menduar me një total prej 16 gjykatash në vend, nga rreth 40 që ishin. Konkretisht mendohet të lihen vetëm 12 gjykata rrethi, 2 Gjykata Apeli dhe 2 Gjykata Administrative.