OFL përfundon në “Kushtetuese”, denoncuesi kërkon që t’i hiqet “njolla” si subjekt i saj

Operacioni Forca e Ligjit, i nisur me bujë të madhe nga autoritetet, ka përfunduar në Gjykatën Kushtetuese, pasi është denoncuar për një aksion të saj si antikushtetues. Konkretisht, bëhet fjalë për aktin Normativ nr.1, të datës 31 janar të vitit 2020, “për masat parandaluese në kuadër të forcimit të luftës kundër terrorizmit, krimit të organizuar, krimeve të rënda dhe konsolidimit të rendit e sigurisë publike”. Ka qenë subjekti i OFL, Edlir Hysenaj, i cili pretendon se i është sekuestruar një automjet në kuadër të OFL, vetëm pasi vëllai i tij rezulton i skeduar për drogë në Gjermani. Edhe pse misioni i ka përfunduar prej kohësh, ky subjekt i këtij ligji ka kërkuar që t’i hiqet kjo “njollë” dhe të mos konsiderohet më si person që e ka pasurinë me prejardhje kriminale. Ndërkohë, Këshilli i Ministrave kërkoi shtyrjen e seancës, me qëllim që të njihet me dokumentet. Ankimuesi e cilëson aktin e 31 janarit 2020 si “antikushtetues, jo në kushtet e nenit 101 të Kushtetutës, nuk ka dalë në kushtet e një vakumi ligjor që do të justifikonte emergjencën mbushëse”. Madje më tej theksohet edhe “referuar dyzimit mes sanksionit penal dhe procesit të natyrës gjoja procedurialo-civile të tij, cenon sigurinë juridike të shtetasit Edlir Hysenaj, teksa pasuria e subjektit dhe familjes së tij është hetuar një herë dhe nga gjykata është vendosur pushimi i procedimit penal”. Në fund theksohet se çështja është jashtë juridiksionit dhe se “çështja e makinës është e provuar si e blerë me të ardhura të ligjshme”.