Ish-kryebashkiaku Fatos Tushe mbetet në qeli, Gjykata e Lartë i rrëzon përfundimisht kërkesën për lirim

Gjykata e Lartë refuzoi dje përfundimisht lirimin e ish-kryebashkiakut të Lushnjës, Fatos Tushe, i arrestuar në muajin korrik të vitit të kaluar për tenderin e kanalit të vaditjes dhe korrupsion, bashkë me 10 zyrtarë të tjerë. Ky vendim i shuan përfundimisht shpresat ish-zyrtarit të lartë vendor socialist për zbutje të masës, teksa SPAK ka në proces mbylljeje hetimin e dosjes dhe mund ta dorëzojë së shpejti për proces. Tre gjyqtarët Ilir Panda, Sokol Binaj dhe Sandër Simoni, e rrëzuan rekursin e Fatos Tushes, duke vlerësuar se nuk ka ndryshuar asgjë nga aktet e dosjes penale, edhe pse ish-kryebashkiaku disa herë ka paraqitur raporte dhe ankesa për probleme shëndetësore. Kujtojmë se më 28 korrik të vitit të kaluar, Apeli i GJKKO ka lënë në fuqi masën e sigurisë “arrest në burg” për ishkreun e Bashkisë së Lushnjës, që dje u konfirmua edhe nga shkalla e tretë. Tushe u arrestua më 6 korrik, me 10 ish-vartësit e tij, nga një operacion i ndërmarrë nga SPAK, për akuzën e shpërdorimit të detyrës. Bëhej fjalë për një tender me vlerë rreth 23 mln lekë për rehabilitimin e një kanali ujitës në fshatrat Bishqethëm dhe Bitaj. Në pranga ranë edhe biznesmenët me lidhje miqësie mes tyre dhe që këmbyen tenderin, Ibrahim Lami dhe Bujar Murati. Tushe ka dalë në përgjime edhe teksa abuzon me karburantin e shtetit, duke furnizuar makinat e të njohurve të tij, mes tyre edhe të djalit të një deputeti dhe një gazetari të njohur në Tiranë, si edhe ka ndërhyrë për një banesë që po ndërtohej pa leje, që inspektorët të mos shkonin për kontroll. Ish-kryebashkiaku i Lushnjës u shkarkua nga detyra nga një vendim i Këshillit të Ministrave, pas aferave korruptive në të cilat ai ishte përfshirë. Bëri ankimim në Kushtetuese, por u tërhoq në momentin e fundit dhe vendimi mbeti në fuqi, duke i hapur rrugë zgjedhjeve të parakohëshme në Bashkinë Lushnjë, që do mbahen më 6 mars.