Politekniku fiton akreditimin 6-vjeçar, por ka edhe disa detyra!
Bordi vendosi akreditimin institucional të institucionit të arsimit të lartë, Universiteti Politeknik i Tiranës me kohëzgjatjen prej 6 vitesh. Afati përfundimtar i vlefshmërisë së akreditimit të institucionit është data 6 janar 2028. Ky është edhe afati maksimal i akreditimit i parashikuar nga legjislacioni në fuqi për institucionet e arsimit të lartë që kalojnë në këtë proces vlerësimi.
Pas vlerësimit të bërë për të gjitha njësitë dhe fakultetet për cilësinë e mësimdhënies dhe kërkimit shkencor, Universiteti Politeknik i Tiranës ka fituar akreditimin periodik 6-vjeçar. Bordi i Akreditimit në Agjencinë e Sigurimit të Cilësisë në Arsimin e Lartë ka dhënë vlerësimin përfundimtar pozitiv për këtë institucion, teksa ka lënë edhe një sërë detyrash që duhet të përmbushen në një periudhë të caktuar kohore. “Bordi vendosi akreditimin institucional të institucionit të arsimit të lartë, Universiteti Politeknik i Tiranës me kohëzgjatjen prej 6 vitesh. Afati përfundimtar i vlefshmërisë së akreditimit të institucionit është data 6 janar 2028”, sqarohet në vendimin e Bordit të Akreditimit. Ky është edhe afati maksimal i akreditimit i parashikuar nga legjislacioni në fuqi për institucionet e arsimit të lartë që kalojnë në këtë proces vlerësimi. Sipas autoriteteve, ky vlerësim paraqet një arritje të Universitetit Politeknik të Tiranës në përmbushjen e misionit të tij dhe objektivave të zhvillimit duke konfirmuar rritjen e vazhdueshme të cilësisë së mësimdhënies e të kërkimit shkencor, si dhe impaktin e institucionit në vend e në rajon.
Por, pavarësisht këtij vlerësimi pozitiv, ky universitet duhet që të përmbushë edhe një sërë rekomandimesh që kanë të bëjnë jo vetëm me angazhimin e stafit akademik, të cilit i kërkohet që të rrisë cilësinë e publikimeve në revistat ndërkombëtare dhe ato me një faktor impakti, por edhe të zhvillojë një strategji për integrimin ndërkombëtar me qëllim rritjen e mobilitetit të studentëve dhe stafit akademik, si dhe integrimin e studentëve dhe stafit akademik të huaj.
Bordi kërkon nga Universiteti Politeknik që të marrë masat për ngritjen sipas standardeve të kërkuara të njësisë së sigurimit të brendshëm të cilësisë, si dhe të marrë masat që Zyra e Karrierës dhe Alumni në ndihmë të studentëve të jetë plotësisht funksionale. Një tjetër rekomandim është që ky universitetet duhet të mundësojë në faqen e tij zyrtare të internetit, hapësirën e nevojshme përkatëse për secilin fakultet, ku informacioni për çdo program studimi dhe veprimtari tjetër duhet të jetë i qartë, koherent dhe i saktë. Për realizimin e këtyre detyrave Universitetit Politeknik i Tiranës i kërkohet të hartojë një Plan Veprimi konkret dhe ta dorëzojë atë brenda 6 muajve pranë Agjencisë së Sigurimit të Cilësisë në Arsimin e Lartë, strukturë e cila do të ndjekë edhe përmbushjen e tyre sipas afateve të përcaktuara.
Universiteti Politeknik i Tiranës zbaton programin e kartës së Bolonjës (3+2) dhe ofron studime të ciklit të parë “Bachelor”, të ciklit të dytë “Master”, si dhe të ciklit të tretë “Doktoraturë”. Shtatë janë fakultetet që janë përfshirë në vlerësimin e cilësisë së mësimdhënies dhe të kërkimit shkencor në këtë Universitet, në të cilat zhvillohen studime të ciklit të parë “Bachelor” në 22 programe të ndryshme, teksa 55 të tjera janë programe të ciklit të dytë “Master profesional” dhe “Master shkencor”. Programet e studimeve për secilin prej këtyre dy cikleve i gjeni të detajuara në vijim të shkrimit. UPT ofron gjithashtu studime të ciklit të tretë “Doktoratura”, të cilat zhvillohen në 15 programe në të gjitha fakultetet përbërëse të saj. Pjesë e këtij universiteti është edhe Instituti i Gjeoshkencave, që është një njësi kombëtare kërkimore, që organizohet në 4 departamente kryesore, ku secila prej tyre përmban deri në tre njësi kërkimore.