Policia: Janë kryer 22 operacione me 126 të prangosur, 16 prej tyre për kultivim dhe trafik droge

Policia e Shtetit bëri dje bilancin e javës që u mbyll, me ngjarjet e ndodhura, veprat penale dhe të ndaluarit. 126 persona janë arrestuar në 22 operacione të ndryshme. Sipas bilancit të bërë nga vetë uniformat blu, 27 kanë qenë të arrestuar nga personat e shpallur në kërkim, 5 prej të cilëve në kërkim ndërkombëtar. “Në total janë arrestuar, proceduar dhe shpallur në kërkim 437 persona, nga këta 126 janë arrestuar, 288 janë proceduar dhe 23 janë shpallur në kërkim”, thuhet në njoftimin zyrtar.

Ndër personat e kërkuar, 22 janë në kërkim kombëtar dhe njëri prej tyre me rrezikshmëri të lartë shoqërore, i kërkuar për vrasje të dyfishtë dhe 5 në kërkim ndërkombëtar. “Janë zhvilluar 22 operacione policore të koduara: “Farka”, “Programuesi”, “Suplier 2”, “Çelësi”, “Dealer”, “Last game”, “Thread”, “Pinet”, “Fati i lojërave” (2 raste), “Përgatitja”, “Ixellesi”, “Miloti”, “Lalm i Ri”, “Last ëinter”, “Qerreti”, “Call me”, “Gaminator”, “Perimetri”, “Basti i fundit”, “Poker” dhe “Horizonti”.

Janë goditur 11 raste të armëmbajtjes pa leje, për të cilat janë arrestuar 6 persona, janë proceduar penalisht 4 persona dhe 1 është shpallur në kërkim. Janë sekuestruar 6 armë zjarri, 2 armë gjahu, 1 armë sportive, 8 armë të ftohta, dy laboratorë për kultivimin e bimëve narkotike me llamba, njësi kompjuterike, tavolina pokeri, çipsa, letra bixhozi për lojëra fati, një sasi kokaine, kanabis, 3.5 tonë kafe, shuma parash e sende të tjera të kundërligjshme”, sqarohet në njoftim. Gjithashtu janë evidentuar 49 raste të krimeve mjedisore, me 5 persona të arrestuar, 43 të proceduar dhe 1 të shpallur në kërkim. 46 raste të zbuluara në fushën e narkotikëve, me 16 persona të arrestuar, 33 të proceduar dhe 1 të shpallur në kërkim. Njoftohet se janë evidentuar edhe 29 raste të dhunës në familje, me 13 persona të arrestuar, 14 të proceduar dhe 2 të shpallur në kërkim; 30 raste në fushën e krimit ekonomik, me 7 persona të arrestuar, 28 të proceduar dhe 1 në kërkim. Katër raste sulmi ndaj policëve, me një të ndaluar dhe 5 të proceduar dhe 13 raste të vjedhjes së energjisë elektrike, ku mes të ndaluarve janë edhe 2 punonjës të OSHEE-së. Policia Rrugore ka pezulluar 485 leje drejtimi, nga të cilat; 311 për shpejtësi tej normave të lejuara, 109 për drejtim mjeti nën efektin e alkoolit apo në gjendje të dehur dhe 65 për qarkullim në sens të kundërt. Janë arrestuar edhe 68 drejtues mjetesh e vendosur 14946 masa administrative.