Pirateri dhe blerje online me karta të vjedhura të 1,7 mln lekëve mall, arrestohet 33-vjeçarja e kërkuar, nën akuzë dhe shoqja
Një tjetër skemë mashtrimi dhe falsifikimi është goditur dje nga Policia e Tiranës. Burime zyrtare thanë se u finalizua një tjetër operacion për goditjen e veprimtarisë kriminale, në fushën e krimeve kibernetike. Në pranga ka rënë 33 vjeçarja J. M., banuese në kryeqytet, e dyshuar për kryerjen e veprës penale “mashtrimi kompjuterik”, ndërsa është proceduar penalisht edhe bashkëpunëtorja e saj M. M., 35 vjeçe, banuese po në Tiranë.
Hetimet kanë nisur pas kallëzimit nga një kompani e telefonisë së lëvizshme. “Pas kryerjes së hetimeve ka rezultuar se një shtetase, në bashkëpunim me një shtetase tjetër, brenda dhe jashtë territorrit të Republikës së Shqipërisë, ka përdorur të dhëna kartash bankare, të cilat dyshohet se janë “vjedhur” nga shtetas të ndryshëm, jashtë territorit të vendit, me qëllim për të përfituar financiarisht, duke blerë pajisje të telefonisë së lëvizshme”, njoftoi policia. Arrestimi u bë në flagrancë gjatë marrjes së pajisjes. “Gjatë kontrollit fizik dhe kontrollit në banesat e këtyre dy shtetasve, janë gjetur dhe sekuestruar në cilësinë e provës materiale dy telefona celular të markës iPhone, karta të ndryshme, dokumente dhe fatura të ndryshme bankare. Nga hetimet e deritanishme ka rezultuar se shtetasja J. M., ka kryer blerje në shumën rreth 1.700.000 lekë, ndërkohë dyshimet janë se ka kryer dhe blerje të tjera në kompani të cilat shesin produkte në rrjet (online) dhe për këtë fakt hetimet janë në vazhdim”, sqaroi policia e kryeqytetit për mënyrën se si funksiononte skema.