Ja çfarë do të përfitojnë “Fëmijët në Përkujdesje të Republikës”
NGRIHET KOMISIONI PËR DHËNIEN E STATUSIT
Ngrihet Komisioni Qendror për dhënien e statusit “Fëmijë në Përkujdesje të Republikës”, i cili do të certifikojë mbështetjen financiare që do të jepet për të gjithë fëmijët pa kujdes prindëror, fëmijët e policëve, mjekëve, infermierëve dhe të gjithë personave të tjerë që kanë marrë, apo kanë përfituar statusin “Dëshmor i Atdheut”.
Lidhur me ngritjen e këtij komisioni, ministrja e Shëndetësisë dhe Mbrojtjes Sociale, Ogerta Manastirli ka bërë me dije se: “Dhënia e statusit për Fëmijë në Përkujdesje të Republikës do të jetësohet menjëherë pas kësaj mbledhjeje të parë. Ashtu sikurse ne të gjithë e dimë ka qenë një angazhim i vetë Kryeministrit Rama për inicimin e këtij ligji kaq të rëndësishëm, i cili mbron fëmijët pa kujdes prindëror, fëmijët e atyre të cilët kanë dhënë jetën në shërbim të tjetrit, kanë sakrifikuar jetën e tyre për ata të cilët kanë pasur afër dhe për t’i shpëtuar ata. Ashtu sikurse janë policët, mjekët, infermierët dhe të gjithë ata të cilët kanë marrë apo kanë përfituar statusin “Dëshmor i Atdheut”, të cilat deri më tani kanë qenë të kufizuara përsa i përket fëmijëve”.
Ky ligj garanton një paketë të plotë përfitimesh duke nisur nga mbështetja financiare me pagën e prindit që ka humbur jetën në krye të detyrës pikërisht duke e përfituar deri në moshën 25 vjeçare nëse vazhdon edhe shkollën e lartë. Në këto kushte, fëmijët në “Përkujdesje të Republikës” do të përfitojnë: pagën e plotë mujore e prindit për fëmijën e vetëm; 140 për qind e pagës kur prindi ka lënë pas dy fëmijë; 150 për qind e pagës kur fëmijët jetimë janë tre; si dhe 160 për qind të pagës së prindit kur në familje janë katër fëmijë që kanë humbur prindin, e me radhë. Përveç trajtimit financiar, këta fëmijë do të kenë mbështetje për edukim e arsimim, punësim, mbrojtje sociale dhe në shërbimin shëndetësor publik e privat. Do të garantohet plotësisht shërbimi shëndetësor falas jo vetëm në strukturat publike, por edhe në strukturat private apo dhe jashtë vendit, kur të jetë e nevojshme. Fëmijët në përkujdesje të Republikës do të përfitojnë gjithashtu bursën për ndjekjen e arsimit parauniversitar në institucionet arsimore publike dhe tekste shkollore falas.
Ministrja Manastirli bëri me dije se në faqen e zyrtare të Ministrisë së Shëndetësisë dhe Mbrojtjes Sociale do të dalë njoftimi për thirrje për aplikim për të gjithë ata të cilët janë përfitues nga ky ligj, duke theksuar se aplikimi do të jetë i hapur gjatë gjithë vitit.