Manipulimi i zgjedhjeve në Shoqatën e Futbollit tirana, Prokuroria nis hetimet ndaj FSHF
Një javë pas vendimit të Gjykatës së Tiranës, që rrëzoi zgjedhjet e dyshimta të drejtuara nga Federata dhe njohu Prodanin si kryetar, vjen lëvizja dhe goditja e dytë juridike për institucionin e Armand Dukës. Oficerët sekuestrojnë dokumentacionin e procedurës së zgjedhjeve të mbajtura nga FSHF, ku u zgjodh Alimehmeti. Kryebashkiaku denoncoi sekretarët Ilir Shulku dhe Ardian Haçi
Federata Shqiptare e Futbollit merr goditjen e dytë juridike nga drejtësia. Pak ditë pas kallëzimit të kryebashkiakut të Tiranës, Erion Veliaj, ndaj FSHF për manipulime për zgjedhjet në Shoqatën Rajonale të ‘Futboll Tirana’, e konfirmuar kjo nga vendimi i Gjykatës së Tiranës, oficerët e Policisë Gjyqësore kanë sekuestruar dokumentacionin në institucionin e futbollit së fundmi.
Prokuroria e Tiranës dhe Sektori i Krimit Ekonomik dhe Financiar, kanë sekuestruar procedurën e ndjekur nga FSHF për shpalljen e garës, njoftimin e garuesve dhe listën e votuesve që zgjodhi Krenar Alimehmetin. Prejt dy ditësh OPGJ kanë qenë në zyrat e e FSHF-së dhe kanë sekuestruar këto dokumente të shumta, pas hetimit të nisur për shpërdorim detyre ndaj dy zyrtarëve të FSHF-së.
Në cilësinë e aksionerit te Klubit të Futbollit Tirana, Veliaj akuzon Ilir Shulkun, me detyrë Sekretar i Përgjithshëm i Federatë Shqiptare të Futbollit dhe Ardian Haçin, me detyrë Sekretar i Përgjithshëm i Shoqatës Rajonale të Futbollit Tiranë, se kanë manipuluar në bashkëpunim zgjedhjet për Kreun e Shoqatës Rajonale të Futbollit të Tiranës.
Veliaj rendit një sërë shkeljesh, teksa thekson se ato janë bërë me një qëllim të vetëm, ndikimin apo paracaktimin e rezultatit të zgjedhjes së Kreut të Shoqatës së Futbollit të Tiranës, sipas interesave klienteliste të kreut aktual të FSHF-së, Armand Duka, i cili kërkonte shumicën e votave për rizgjedhjen President më 2 mars. Pak ditë më parë, Gjykata e Tiranës e rrëzoi praktikën e zgjedhjes së Krenar Alimehmetit, duke njohur Eduart Prodanin, si kryetar të Shoqatës Rajonale të ‹Futbol Tirana›. Zgjedhjet e njëanshme nga FSHF dhe në konflikt të pastër interesi, u denoncuan menjëherë, teksa Bashkia bëri mbledhje të rregullt dhe zgjodhi si kryetar Prodanin. Gjykata e vlerësoi një javë më parë të ligjshme procedurën e Veliajt, duke regjistruar pikërisht Prodanin si kryetar. Ky verdikt i hapi rrugën hetimeve të mëtejshme për “falsifikim dokumentesh” nga ana e zyrtarëve të FSHF-së, që kanë kompetencat për të drejtuar procedurat për zgjedhjet në shoqata. Në këtë rast do hetohen Shulku dhe Haçi, dy të denoncuarit nga kryebashkiaku.