PS këmbëngul për 4 emra, për 4 vakancat në KLP e KLGj, PD: S’ka garë!
Socialistët refuzuan me forcën e kartonëve në nënkomisionin parlamentar kërkesën e PD-së për përfshirjen në garën e kandidatëve për në Këshillin e Lartë të Prokurorisë dhe Këshillin e Lartë Gjyqësor të disa emrave të skualifikuar nga Sekretari i Kuvendit, Genci Gjonçaj me arsyetimin e mospërmbushjes së kriterit të vjetërsisë në punë.
“Ka kandidatura që kemi skualifikuar që plotësojnë kriteret. Për ne nuk ka garë, sepse janë vetëm katër kandidatura për 4 vende vakante në KLP e KLGj dhe ne me këto kandidatura këtu bëjmë sikur votojmë dhe bëjmë sikur po bëjmë garë. Këtu nuk ka konkurrencë. Do të ishte mirë që t’i merrnim parasysh këto kandidatura të skualifikuara. Aty kishte emra të edukuar jashtë dhe përvojë pune jashtë”, deklaroi deputetja e PD-së, Dhurata Çupi.
Kryetarja e Komisionit të Ligjeve, Klotilda Bushka këmbënguli në qëndrimin strikt të përcaktimit ligjor përsa i përket kriterit të vjetërsisë së punës, i përdorur nga Sekretari i Kuvendit për të skualifikuar mes të tjerëve edhe tre emra juristësh të shkolluar dhe me përvojë pune jashtë Shqipërisë, por të zgjedhur nga bota akademike si kandidatë që plotësojnë kriteret kushtetuese.
Në mungesë të dakordësisë përcaktimi se si do të ndaheshin emrat për dy vendet vakante në KLP dhe dy vendet vakante në KLGj u hodh shorti. Ashtu si në shortin e hedhur dy javë më parë, edhe këtë herë emrat ishin të njëjtë me Yllka Rukën, Mirela Bogdanin, Orjona Muçollari dhe Ilir Rusin. Shorti përcaktoi Ilir Rusin dhe Orjona Muçollarin si kandidatura për në KLGj, ndërsa Yllka Ruka e Mirela Bogdani për dy vendet vakante në KLP, njëri prej të cilit për mandatin e Gent Ibrahimit, kryetarit të këtij institucioni.
Katër emrat u rrëzuan në votimin e parë në Kuvend, ku nuk siguruan dot shumicën prej dy të tretave. Që të katër ata siguruan
87 vota pro nga 94 që u nevojiten. Opozita kundërshtoi procesin edhe në fazën e parë të tij, ku vuri në pikëpyetje raportin e vlerësimit të Sekretarit të Kuvendit, Genci Gjonçaj, i cili skualifikoi 5 nga 9 kandidatët e dorëzuar nga trupa e pedagogëve.
Sipas përcaktimit të ligjit për organet e qeverisjes së sistemit të drejtësisë, nëse katër emrat e propozuar nuk sigurojnë shumicën prej 94 votash, e njëjta procedurë përsëritet për herë të tretë, por në këtë rast kandidatët e renditur të parë emërohen në detyrë, pavarësisht nëse nuk marrin shumicën prej dy të tretave në Kuvend.