A do i raportojnë zyrtarët e UEFA-s shkeljet e Dukës te Ceferini? Çfarë thotë i dërguari Nikola
Manipulimi i zgjedhjeve nëpër shoqatat rajonale ka bërë që UEFA të sjellë mision monitorimi në Tiranë. Delegacioni i UEFA-s, me mision monitorimin e procesit zgjedhor në Federatën e Futbollit, nisi punën këtë të hënë. Tre zyrtarët mbërritën nga Zyrihu në zyrat e FSHF-së, ku janë njohur me zhvillimet e fundit dhe kanë kërkuar informacion të imtësishëm për proceset zgjedhore në shoqatat rajonale, të cilat kanë paditur Armand Dukën për manipulime dhe trukim të rezultatit, me qëllim paracaktimin e rezultatit për presidentin aktual. Por a do ta raportojnë revizorët e UEFA-s siç duhet situatën e dukshme manipulative ku është përfshirë FSHF, konfliktet e interesit, përdorimi i rrogtarëve në fushatë, si dhe humbja juridike që pësoi në Gjykatën e Tiranës?
Në ditët e qëndrimit në Shqipëri, pasi të njihet me të gjitha problematikat, pretendimet e palëve dhe të shqyrtojë dokumentacionin e procesit zgjedhor, misioni monitorues i UEFA-s do të përgatisë një raport të detajuar, i cili do t’i paraqitet Presidentit të UEFA-s, Alexander Ceferin, kryeministrit Edi Rama, si edhe FSHF-së. Gjykata e Tiranës ka rrëzuar zgjedhjet e organizuara nga Federata Shqiptare e Futbollit për Shoqatën Rajonale të Tiranës, duke i cilësuar ato të manipuluara. Gjykata e Tiranës ka njohur asamblenë e thirrur nga kryebashkiaku Erion Veliaj, dhe ka regjistruar Eduard Prodranin si drejtues të Shoqatës Rajonale të Tiranës. Në vendimin e saj, Gjykata i ka dhënë të drejtë kryebashkiakut Veliaj duke njohur manipulimet e organizuara nga Federata Shqiptare e Futbollit.
Luka Nikola (Shef i qeverisjes së federatave anëtare në UEFA), Luka Zajc (Shefi i Çështjeve Korporative) dhe Jan Hafner (Ekspert i çështjeve statutore dhe rregulloreve), që nga dita e hënë janë në vendin tonë duke shqyrtuar dokumentacionin e FSHF-së për ligjshmërinë e zgjedhjeve.
Siç u shpreh vetë Luka Nikola, “objektivi kryesor ishte të vlerësohej ky proces zgjedhor i institucionit të futbollit, për të cilin kanë lindur dyshime të mëdha se ka baza të shëndosha ligjore”.
“Së pari, për të shpjeguar kontekstin e misionit tonë, ne kemi ardhur në vijim të vizitës së fundit të Presidentit të UEFA-s në Shqipëri, ku ai u takua me Kryeministrin e Shqipërisë, si dhe me Presidentin e Federatës Shqiptare të Futbollit. Objektivi i misionit tonë është të vlerësojë procesin zgjedhor të FSHF-së, si edhe Asamblenë e Përgjithshme të Zakonshme Zgjedhore, të planifikuar për t’u zhvilluar më 2 mars 2022. Gjithashtu, ky mision përfshin edhe vlerësimin e rasteve të mundshme të ndikimit të papërshtatshëm nga palët e treta në procesin zgjedhor. Sapo misioni ynë të përmbyllë vizitën, do të përgatisim një raport për drejtuesit e UEFA-s dhe bazuar në këto gjetje ne do t’i komunikojmë FSHF-së qëndrimin e UEFA-s”, tha Nikola.