I janë sekuestruar 1 mln euro për korrupsionin me operacionet në zemër, GJKKO i ‘jep bisturinë’ kardiologut, Edvin Prifti i rikthehet profesionit
Një vit pas akuzave për korrupsion dhe pastrim parash, kardiologu Edvin Prifti fiton të drejtën për të ushtruar profesionin e mjekut. Gjykata e Posaçme e ka pranuar kërkesën e tij për të ushtruar profesionin, teksa SPAK ende nuk ka përfunduar hetimet. Më herët mjeku kishte depozituar disa kërkesa për licencën dhe njëkohësisht për rikthimin e parave të sekuestruara, pak më shumë se 1 mln euro, por GJKKO ia kishte rrëzuar. Mjeku Edvin Prifti akuzohet se mori ryshfet nga kryesekretarja e Gjykatës së Krujës, Manuela Mallakuçi, (e dënuar për çështjen e korrupsionit në drejtësi pak ditë më parë, për t›i operuar nënën. Mallakuçi ishte nën përgjim, pasi ishte përfshirë në lirimin e të dënuarit Saimir Petani, nga gjyqtarja Enkelejda
Hoxha. Në një prej shumë bisedave, Mallakuçi është kapur duke folur me Priftin dhe sekretaren e tij, që t’i kryente një operacion jashtë radhe nënës së saj në këmbim të parave. Gjatë kontrollit mjekut prifti iu gjetën afro 380 mijë euro, ndërsa iu sekuestruan në total pak më shumë se 1 milionë euro. Ndërsa vijojnë hetimet, mjeku ka fituar të drejtën si të mësimdhënies, ashtu edhe të ushtrimit të profesionit. Bashkë me të u morën nën hetim kryeinfermierja dhe sekretarja, teksa sipas SPAK janë gjetur blloqe dhe zarfe me euro, që dyshoheshin si pagesa për operacionet e kardiokirurgut. Prifti ka thënë se paratë janë të ardhura nga biznesi dhe aktivitetet financiare të gruas. Por prokurorët thanë se shumica e parave i janë gjetur edhe në një kasafortë në zyrën e tij në spital.