KUNDËR MAFIAS SË ILAÇEVE!
Duhani e droga, pushka e plumbi, femra dhe skllavi modern, e shumë të tjera, dihen fare mirë nga të gjithë tashmë, që hyjnë e dalin kontrabandë nëpër shtete, nëpër njerëz, mjedise, në ajër, ujë e tokë kudo nëpër natyrën e paanë të planetit tonë. Dhe përdoruesi i këtyre lloj mallrave është vetëm njeriu që lufton për të fituar sa më shumë parà. Kështu e katandisi ai veten dhe kështu do ta vuajë në këtë rend ekonomiko-shoqëror ku gjithçka është mall dhe ku tërëçka shihet si burim fitimi material në kurriz të të tjerëve. Formalisht e me mashtrime shtetet (lexo: grupet kriminale të maskuara, si makina shtypëse, që sundojnë ekonominë dhe shoqërinë e një kombi a vendi të caktuar)flasin e pëllasin për humanizëm, për të drejta të njeriut, me metodën “të buzëqesh në dritare dhe të shqyen në dhomë”. Nuk them gjë të re kur përsëris se nafta, armatimi, duhani, prostitucioni kanë qenë vazhdimisht burime të fuqishme fitimi, por tani, këto tre vite, mjeti kryesor i fitimit është kthyer industria më e paimagjinueshme farmaceutike dhe mashtrimi më i madh i derisotshëm i popujve është ky mjet vdekjeprurës. Kjo industri, në duart e kapitalit të madh botëror, në këtë shekull, me një gur po vret disa zogj: rrit vdekshmërinë reale në të gjitha vendet në kohë të caktuar; shton fitimet marramendëse të bosëve të kapitalit; ngre me ritme të larta varësinë direkte të jetëve njerëzore vetëm nga ilaçet; ndryshon për keq drejt pesimizmit dhe atrofizimit të virtyteve dhe fuqizimit të veseve, përgjatë tërë viteve të jetës dhe psikologjisë shoqërore të banorëve të të gjithë globit; sofistikon mashtrimin duke e çuar atë në majat më të larta; rishpërndan zonat e influencës dhe kolonive moderne; zgjat jetën e kompanive plot kthetra shumëkombëshe, etj. Ky lloj biznesi që po ushqen sistemi ekonomik-shoqëror imperialist ka sjellë vdekje të panumërta të banorëve të globit nga ilaçet që prodhohen dhe propagandohen për t’u blerë, mbasi ‘garantojnë shërimin’, deri sa njeriu i gjorë kalon në varësi të ilaçit. Le të kujtojmë se numri i vdekjeve të kovid-19 dhe mutacioneve të tij në këto tre vjet në botë, sipas atyre të shpallur në media, është thuajse e barabartë me atë të vdekurve në Luftën e Parë Botërore. Kalimi në varësi është sëmundja më e rrezikshme që është përhapur tashmë edhe tek ne, vendin tonë të vogël e dikur të virgjër nga këto zuzarllëqe të pista. A nuk janë bosët tanë të farmaceutikës që sjellin dhe shesin ilaçe të skaduara të cilave ua kanë ndërruar datën e skadimit? A nuk është kompania amerikane Phizer ajo që dikur medikamentet e skaduara i dërgoi në Europë? A nuk janë biznesmenët grekë dhe maskarenjtë shqiptarë që sjellin përditë produkte demek mjekësore që s’janë aspak të tilla, nga shteti fqinj jugor? A nuk janë bosët kontrabandistë shqiptarë ata që sjellin nga Serbia, Sllovenia,Italia e shtete të tjera ilaçe kontrabandë? Kësisoj humanizmi është kthyer, si shumë të tjera, në një maskë që po mbulon keqas veprimtarinë armiqësore të bosëve të euros dhe dollarit në vendin tonë. Kjo gjendje do të vijojë nëse qeveria fle gjumë, bën të paditurin apo më keq përkrah kontrabandën e medikamenteve. Është njëqind herë më e mirë rruga e përdorimit të barnave që dalin prej bimëve tona të shumta mjekësore dhe shfrytëzimi i mundësive që ofron natyra shqiptare ende e padegraduar.
Ilmi S.Qazimi