Gjermania i dhuron RENEA-s dhe FNSH-ve pajise moderne, autoambulanca dhe uniforma. Nano-Zigraf: Prioritet, lufta kundër krimit

Policia Federale Gjermane i dhuron Repartit Special RENEA 2 automjete bashkëkohorë për Njësinë e Negocimit dhe Njësinë Antieksploziv, uniforma dhe pajisje të tjera dhe 2 autoambulanca për Repartet NSH Fier dhe Shkodër. Ky donacion shkon në vlerën 344464 euro. Në ambientet e Repartit Special RENEA, u zhvillua edhe ceremonia e dorëzimit, ku ishin të pranishëm drejtori i Përgjithshëm i Policisë së Shtetit, Gledis Nano dhe ambasadori i Gjermanisë në Shqipëri, Peter Zingraf. “E vlerësoj me rëndësi të veçantë këtë ceremoni, pasi nga sot, disa automjete të reja e të kompletuara me pajisje speciale e uniforma, me vlerë totale mbi 344 mijë euro, do të jenë në përdorim të RENEA dhe FNSH. Pa asnjë hezitim evidentoj se shteti gjerman, nëpërmjet Ministrisë së Brendshme Federale dhe Ambasadës Gjermane në Shqipëri, është bërë mbështetës dhe partner tepër i rëndësishëm i Policisë shqiptare, në përmbushjen e misionit të saj”, u shpreh Nano. Ambasadori i Gjermanisë në Shqipëri, Peter Zingraf tha ndër të tjera:

“Thelbi i bashkëpunimit policor mes vendeve tona është lufta kundër kriminalitetit ndërkufitar që zhvillohet në nivel ndërkombëtar dhe këtu bashkëpunimi me strukturat e Policisë Federale dhe Zyrës Federale të Krimeve është i një rëndësie thelbësore. Sigurisht dhe mbështetja që jep Gjermania për Shqipërinë, në rrugën e saj drejt integrimit në Bashkimin Europian, në mënyrë të vecantë luftës kundër krimit të organizuar dhe korrupsionit. Ne dëshirojmë që përmës këtij bashkëpunimi të mbështesim të gjithë sektorët e aktiviteteve apo operacioneve policore, në mënyrë që të jemi të suksesshëm në çdo drejtim. Edhe në vitin 2022 ne do të vijojmë bashkëpunimin tonë përmes angazhimit dhe shfrytëzimit të pajisjeve teknike dhe pajisjeve të standardizuara...”. Më pas, Nano dhe Zingraf kanë nënshkruar aktin e dorëzimit të donancionit, kurse komandanti i Repartit, në shenjë falënderimi, i ka dorëzuar ambasadorit stemën e RENEA-s, me moton “Mbrojmë jetë me jetën tonë”.