Ishte më i kërkuari në Luksenburg, dështon ekstradimi i Edinjo Pultit

Policia e liroi pas verifikimeve dhe procedurave juridike, pasi nuk mund të izolohej me vendim të Gjykatës së Rrethit, me qëllim ekstradimi. Shkak, mungesa e marrëveshjes mes dy vendeve. Pulti, i kërkuar për tentativë vrasjeje, me pasojë plagosjen e rëndë, të dy personave në Petagne, më 2 gusht 2020. U kap në një lokal në fundjavë, urdhër-arresti edhe për trafik armësh dhe eksplozivi

Mungesa e marrëveshjeve dypalëshe për ekstradime çon drejt dështimit një tjetër operacion. Policia e Shkodrës ka lënë të lirë Edinjo Pultin, i kërkuar dhe arrestuar me urdhër të EUROPOL, për një krim në Luksenburg. “Në mungesë të një marrëveshjeje ekstradimi me Luksenburgun, i dyshuari është lënë i lirë”, njoftoi policia për rastin në fjalë.

Edinjo Pulti, i lindur në vitin 1981, akuzohet për tentativë vrasjeje. Më 2 gusht 2020, rreth orës 20:55, u përfshi në një përleshje në Pétange të Luksenburgut. autoritetet vendase e klasifikuan atë si më të kërkuarin e listës. Sipas EUROPOL, Pulti ka goditur disa herë me thikë dy persona. Një nga dy të plagosurit është goditur në bark dhe ka mbetur i plagosur rëndë.

Një urdhër-arresti europian dhe ndërkombëtar është lëshuar për të, në muajin janar 2021. “Një person me precedentë të rrezikshëm kriminalë është shoqëruar nga efektivët e policisë së Shkodrës, mbrëmjen e së shtunës, në një lokal nate”, thuhej në njoftimin zyrtar të fundjavës. Më tej theksuan se bëhej fjalë për Pultin, që pas verifikimeve dhe masës, është lënë i lirë, pasi Shqipëria nuk ka një marrëveshje ekstradimi me Luksemburgun, shtetin që e kërkon 36-vjeçarin për disa vepra penale.

Gjithashtu Pulti akuzohet nga Luksenburgu edhe për trafik armësh, eksplozivi dhe municionesh. Ata e kanë klasifikuar së fundmi edhe si “Më i kërkuari”.

Një urdhër-arresti europian dhe ndërkombëtar që tashmë është zhvlerësuar dhe bëhet precedenti i radhës i dështimit juridik, për shkak të mungesave të marrëveshjeve dypalëshe.

Më parë kanë dështuar edhe ekstradime me Belgjikën, një tjetër vend ku mungojnë marrëveshjet mes drejtësive të vëndeve. Edinjo Pulti nga Shkodra është emër i njohur edhe për drejtësinë shqiptare, për një plagosje shumë vite më parë.