Ulen ndjeshëm infektimet, regjistrohen edhe 6 viktima
SITUATA E COVID-19 NË VEND
Bien ndjeshëm infektimet me Covid-19 në vend, por fatkeqësisht vijojnë të jenë të larta fatalitetet e shënuara në radhët e të shtruarave në spitale. Edhe 6 të moshuar të tjerë nuk ja kanë dalë dot që të fitojnë betejën me koronavirusin përgjatë ditës së djeshme, duke e çuar kështu në 3451 numrin e viktimave të regjistruara që nga nisja e pandemisë në vendin tonë. Nga të dhënat e deklaruara prej strukturave të shëndetit publik rezulton se listës së të infektuarave gjatë ditës së djeshme i janë shtuar edhe 85 qytetarë të rinj.
Në përditësimin e të dhënave, Ministria e Shëndetësisë bën me dije se në 24 orët e fundit janë kryer 1754 testime, nga të cilat kanë rezultuar pozitivë me koronavirus 85 qytetarë, në këto bashki: 23 në Tiranë, 10 në Berat, 8 në Sarandë, 7 në Fier, nga 4 qytetarë në Peqin, Vlorë, Durrës, nga 3 qytetarë në Lezhë, Lushnje, Mallakastër, nga 2 qytetarë në Gramsh, Gjirokastër, Mirditë, nga 1 qytetar në Kukës, Tropojë, Kavajë, Selenicë, Delvinë, Dropull, Përmet, Këlcyrë, Pogradec, Poliçan. Po gjatë ditës së djeshme bëhet e ditur se janë shëruar 633 qytetarë duke e çuar numrin e të shëruarve në 263,035 që nga fillimi i epidemisë.
Janë 3969 pacientë aktivë me koronavirus në të gjithë vendin, aktualisht në spitalet Covid po marrin trajtim 71 pacientë, nga të cilët 14 janë në gjendje më të rënduar. “Në 24 orët e fundit me gjithë përpjekjet e stafit mjekësor ka gjashtë humbje jete me SARS-COV2 pozitiv: një qytetare nga Tepelena 69 vjeçe, një qytetar nga Elbasani 72 vjeç, një qytetar nga Durrësi 80 vjeç, një qytetare nga Kavaja 81 vjeçe, një qytetar nga Vlora 85 vjeç, një qytetare nga Tirana 88 vjeçe”, raportoi dje Ministria e Shëndetësisë.