Karburanti i shtrenjtë, Transporti Kombëtar: Nga 1 Marsi nuk do të ofrohet shërbimi me abone!

Pas paralajmërimit për ndërprerje të shërbimit të transportit urban nga 1 Mars operatorët njoftojnë edhe për mosshitjen e aboneve për autobusët e tiranës.

Për shkak të krizës financiare në të cilën gjenden kompanitë e transportit urban pohuan për Monitor se nuk kanë mundësi financiare të tërheqin dhe të shesin abonetë.

Unioni i transportit Publik nënvizon se nëse institucionet shtetërore nuk marrin në konsideratë plotësimin e kërkesave për heqjen e taksave të karburantit, shërbimi i transportit nga 1 Marsi do të ndërpritet në rang kombëtar.

“Në vijim të shkresave dërguar të gjitha institucioneve vendimmarrëse në lidhje me problematikat e transportit publik qytetas në nivel kombëtarë, që kanë të bëjnë me pamundësinë financiare të operimit normalisht, informojmë qytetarët se në mungesë të një ndihme reale nga Qeveria, janë të pamundur për të ofruar të gjitha shërbimet e këtij aktiviteti. Sa më sipër, për muajin Mars, nuk mund të ofrohet si shërbim me bileta të pajtimit mujor (ABONE), pasi aktiviteti që ne përfaqësojmë ndodhet në kolaps ekonomik. Mbetemi ende me shpresën e një zgjidhje të kësaj situate sipas premtimeve të bëra”, thuhet në njoftim.

Ndërprerjen totale të shërbimit operatorët e transportit urban e paralajmëruan edhe në Tetor të 2021, pasi rënia e numrit të udhëtarëve nga pandemia, pamundësonte financiarisht vazhdimin e aktivitetit.

Për të kompensuar humbjet nga rënia e frekuentimeve qeveria miratoi fondin me vlerë 1 mln euro për subvencione direkte për 12 operatorët e transportit urban kryeqytetas për periudhë 6 mujore.

Më herët Shoqata e Kombëtare e Transportit Qytetas deklaroi se rritja e çmimit të

naftës shtoi vështirësitë e operatorëve, dhe për të kompensuar humbjet është e domosdoshme miratimi i kërkesave të tyre fiskale që nga rimbursimi i TVSH-së në shitje, Heqja e akcizës të naftës 37 lekë/litër; Heqja e taksës së qarkullimit në karburant për subjektet e licencuara që ushtrojnë aktivitetin në transportin urban (qytetës) 27 lekë/litër, si dhe rimbursimin e çmimit të biletës për kategoritë (Invalidë pune, të verbër, paraplegjik, tetraplegjik, studentët) të cilët udhëtojnë falas.