Dimri nuk ikën lehtë, dëbora izolon përsëri disa rajone

Reshje të dendura dëbore në Korçë, bllokohen disa fshatra të njësive administrative malore. Probleme dhe në Leskovik, Ersekë, Devoll dhe deri në Pogradec, shumë fshatra pa energji dhe me dëborë deri në dy metra, si në Panarit. Këshillohet lëvizje me zinxhirë. Vështirësi qarkullimi edhe drejt pikës kufitare të Kapshticës. Dëborë edhe në malësitë e Dibrës, Kukësit, Elbasanit dhe Tiranës. Edhe Dajti ‘vishet’ me të bardha

Shqipëria përfshihet përsëri nga dimri polar, me acar, reshje shiu dhe dëbore, pothuajse në të gjithë vendin. Më problematike situata ka qenë në Korçë, me borë gjatë gjithë natës, ndërsa vijuan edhe në mëngjes, të shoqëruara me erëra të forta. trashësia e dëborës ka shkuar në gjysmë metri, ndërsa në rrugën e dardhës, në lartësinë mbi 1100 metra mbi nivelin e detit, ka stuhi ere dhe dëborë. Situata problematike shfaqet edhe në Bashkinë e Kolonjës. Gjatë natës për shkak të dëborës dhe erës së fortë i gjithë qyteti i Ersekës dhe Leskoviku kanë qenë pa energji elektrike, ndërsa vetëm pak minuta më parë grupet e punës që ndodhen në terren bënë të mundur rikthimin e energjisë në qytet, ndërsa në pjesën më të madhe të fshatrave situata mbetet njësoj, pa energji elektrike. trashësia e dëborës në zonën e Kolonjës i kalon mbi 30 cm ndërsa më e rënduar situata paraqitet në zonat e fshatrave te thella. Ndërkohë në bashkinë Maliq ka mungesë energjie në fshatrat Pojan, Zvezdë dhe në njësitë Gorë dhe Moglicë, ndërsa rrugë të bllokuara sipas informacioneve më të fundit është rruga e dusharit. Zona e devollit ka pasur probleme me energji elektrike, kurse trashësia e dëborës shkon nga 30-40 cm. Fshatrat e thella malore, arrza, Vidohova etj., të bllokuara në këto zona trashësia shkon deri më 60 cm. Në fshatrat e Korçës, si Shtyllë apo Panarit, situata mbetet më problematike. Fshati Panarit i bllokuar ndërsa trashësia e dëborës ka shkuar deri në 2 metër. Në Pogradec shumë fshatra pa energji elektrike, kurse zona e Mokrës e bllokuar. Ndërkohë që kontraktorët janë duke punuar në akset rrugore, për mirëmbajtje dimërore.

Reshje dëbore janë raportuar edhe në zonat e Librazhdit, dibrës dhe Kukësit, por pa të dhëna konkrete për fshatra apo rrugë të bllokuara.

Reshje dëbore pati edhe në Llogora. Që prej mëngjesit të ditës së djeshme, ulja e temperaturave dhe reshjet e shiut në gjithë qarkun e Vlorës ka sjellë dhe reshjet e dëborës, duke vështirësuar qarkullimin e mjeteve. aksi rrugor që përshkon këtë zonë është i hapur për të gjitha automjetet, ndërkohë që trashësia e dëborës është deri në 10 cm dhe e kalueshme me zinxhirë.

dëbora përfshiu edhe tiranën në zonat e saj malore dhe kryesisht segmenti gjeografik i malit të Dajtit dhe deri në zonën e Krujës apo afër Elbasanit. trashësia e saj shkoi në mbi 10 cm, por pa probleme në qarkullimin rrugor. Kurse tirana dhe qytetet bregdetare u përfshinë kryesisht nga reshje të dendura shiu dhe temperatura të ulëta.