edhe Këshilli Bashkiak i Kurbinit, me rezolutë kundër hartës së re gjyqësore
Takimi i mbajtur mes këshilltarëve dhe juristëve, çoi në vendimin unanim të firmosur, që do i dërgohet Kryeministrisë, Ministrisë së Drejtësisë dhe KLGJ-së: “Të mos hiqet Gjykata e Kurbinit, i ka të gjitha kriteret dhe standardet. Nëse mbyllet, do nisin protestat!”. Flet dhe kreu i Dhomës së Avokatisë, Elton Laska: “Të gjendet zgjidhja mes palëve”
Pas Këshillit Bashkiak të Korçës, edhe i Kurbinit ka miratuar së fundmi rezoltutën kundër hartës së re gjyqësore të Ministrisë së drejtësisë dhe KLGJ-së, që do t’i përcillet Kryeministrisë dhe dikastereve të linjës. aty kërkohet që gjykata të qëndrojë në Kurbin. Harta e re gjyqësore parashikon dhe shkrirjen e Gjykatës së Kurbinit.
“Është shumë domethënëse që kjo rezolutë t’iu drejtohet të gjitha institucioneve qendrore KLGJ, Kryeministrisë dhe Ministrisë së drejtësisë, që kanë në dorë miratimin dhe ndryshimin e hartës së re gjyqësore. Në këtë hartë është propozuar shkrirja e Gjykatës së Kurbinit”, shprehet Elton Laska, kryetar i dhomës së avokatisë Lezhë.
ai thotë se Gjykata e Kurbinit i plotëson të gjitha kriteret për të mos u mbyllur, ndërsa paralajmëron protesta, nëse kërkesat e tyre nuk do të merren në konsideratë.
“Me anë të kësaj rezolute, Këshilli Bashkiak i Kurbinit i pozicionohet qartësisht kërkesës për qëndrimin e kësaj gjykate në Kurbin, duke pasur parasysh që Gjykata e Kurbinit ka ambiente të mjaftueshme dhe vetë KLGJ me anë të raportit që ka publikuar, e ka cilësuar si një godinë të mjaftueshme me hapësira të nevojshme për zhvillimin dhe procesin që i nevojitet gjykatës. Kjo do të thotë që janë të gjitha mundësitë që kjo gjykatë të vazhdojë të funksionojë edhe në të ardhmen. Reagimet e qytetarëve janë shumë të ashpra në momentin që kuptojnë që një gjykatë rrethi me të gjitha mundësitë që mund të jetë funksionale, të hiqet dhe të bashkohet me një hapësirë tjetër. Nëse nuk do ketë reflektim nga hartuesit e kësaj harte gjyqësore, përshkallëzimi i protestave dhe i ankesave të qytetarëve do të jetë shumë i madh”, vijon Laska.
Referuar hartës së re gjyqësore të propozuar nga Ministria e drejtësisë dhe Këshilli i Lartë Gjyqësor, Kurbini do të bashkohet me Lezhën, por sipas grupeve të interesit, diçka e tillë rrit kostot dhe sjellë mungesë shërbimi për qytetarët.
Më datë 3 shkurt, edhe Këshilli Bashkiak i Korçës miratoi rezolutën kundër propozimit për hartën e re gjyqësore. Propozimi për hartën e re gjyqësore ka hasur edhe në kundërshtinë e avokatëve, që e konsiderojnë atë si skemë të pamundur për të funksionuar. ata kanë argumentuar se në këtë mënyrë do të largoheshin gjykatat nga qytetarët dhe se i mohon atyre shërbimin gjyqësor. Ministria e drejtësisë ka deklaruar se do të dëgjojë këshillat e palëve të treta dhe gjatë konsultimeve që po bëhen, por theksoi se reforma në gjyqësor është e nevojshme.
Harta e re gjyqësore parashikon 12 gjykata të shkallës së parë të juridiksionit të përgjithshëm dhe vetëm 1 Gjykatë apeli për juridiksionin e përgjithshëm dhe 1 për atë administrativ. Sa i përket gjykatave të shkallës së parë administrative parashikohet të jenë 2, në Lushnjë dhe në tiranë, nga 6 që janë aktualisht. Pra, nga propozimi konkludohet që nga 36 gjykata që janë aktualisht, të ngelen 16 të tilla.