Përfundojnë bisedimet Ukrainë-Rusi, pritet raund i dytë
takimi mes Ukrainës dhe Rusisë është mbyllur pas më shumë se pesë orësh bisedime me dyer të mbyllura, pa prodhuar asgjë konkrete sa i takon uljes së armëve.
Ukraina shkoi në këtë tryezë vetëm me një kërkesë urgjente, armëpushimin e menjëhershëm dhe tërheqjen e trupave ruse nga vendi i tyre.
Mediat ruse thonë se delegacionet janë tërhequr për konsultime në Moskë dhe Kiev dhe pritet që të ketë një raund të dytë bisedimesh brenda pak ditëve, po në të njëjtin vend, pra në kufirin mes Bjellorusisë dhe Ukrainës.
Përpara përfundimit të këtyre bisedimeve, Vladimir Putin zhvilloi një bisedë telefonike me Presidentin francez, Macron.
Sipas mediave franceze,
Putin ka kërkuar që marrëveshja me Kievin mund të arrihet pas çarmatosjes dhe denazifikimit të Ukrainës, si dhe garancisë se ky vend do të jetë neutral.
Gjithashtu, një tjetër kusht i Putin është njohja ndërkombëtare e Krimesë si territor rus. Nga ana tjetër “Elysee” deklaron se Macron i kërkoi presidentit rus të ndalojë të gjitha operacionet dhe sulmet kundër civilëve, të ruajë infrastrukturën civile dhe të sigurojë rrugët kryesore.
“Putin konfirmoi gatishmërinë e tij për t’u përkushtuar ndaj këtyre kërkesave”, thuhet në deklaratën e Presidencës franceze.
takimi në fakt nuk ndaloi bombat ruse që sipas mediave ndërkombëtare po bien si shi në Kharkiv dhe autoritetet lokale denoncojnë vdekjen e dhjetëra civilëve;
Rusët, nga ana e tyre, njoftojnë rrethimin e Mariupolit, një qytet port dhe qendër strategjike për lidhjen e donbass dhe Krimesë tashmë në duart e Moskës.
Në vend të kësaj, kontrolli ekonomik rreth Putinit po shtrëngohet: në pak orë rubla ka humbur 30% të vlerës së saj, Shtetet e Bashkuara kanë ndaluar të gjitha marrëdhëniet me bankën qendrore ruse, duke eliminuar kështu një rezervë valutore prej 600 miliardë dollarësh për Moskën; Zvicra theu neutralitetin e saj duke nisur një paketë sanksionesh të ngjashme me atë të BE-së, raportuan mediat e huaja.
“Çështja kryesore në bisedime është një armëpushim i menjëhershëm dhe tërheqja e trupave nga Ukraina”, sqaroi presidenca ukrainase përpara takimit.
Në krye të delegacionit rus është një tjetër Vladimir: Medinsky, këshilltari i Putinit, ishministër i Kulturës (2012-2020) i njohur për nacionalizmin e tij ekstrem. Për shumë vëzhgues kjo nuk ishte një shenjë premtuese.
Me Medinsky ishin zëvendësministrat e Mbrojtjes dhe Punëve të Jashtme, alexander Fomin dhe andrei Rudenko, ambasadori rus në Bjellorusi, Boris Gryzlov dhe kreu i Komisionit të Jashtëm të dumës, Leonid Slutsky.
Ndërkohë, me kërkesë të Ukrainës, Roman abramovich ndodhej në Bjellorusi për të marrë pjesë në negociata. Milioneri rus me pasaportë izraelite «u kërkua nga Ukraina për të ndihmuar në bisedime dhe udhëtoi në Bjellorusi për të marrë pjesë në diskutime», raportoi Jerusalem Post. Ndërsa delegacioni ukrainas përfshiu Ministrin e Mbrojtjes Oleksiy Reznikov, këshilltarin e shefit të zyrës së Presidentit të Ukrainës Mykhailo Podoliak dhe zëvendësministrin e Punëve të Jashtme të Ukrainës Mykola tochytskyi.
Presidenti i Ukrainës Volodymyr Zelensky nuk ishte pjesë e delegacionit.
Me një kolonë të gjatë me automjete ushtarake ruse që po shtyjnë drejt Kievit, mëngjesin e të hënës një delegacion ukrainas mbërriti në kufirin me Bjellorusinë për bisedime me Rusinë, edhe pse Presidenti Volodymyr Zelensky shprehu më herët pak shpresë se takimi do të sillte përfundimin e konfliktit në ditën e pestë të pushimit.
Zelensky, i cili nuk ishte i pranishëm në takim, tha se Ukraina do të kërkonte «një armëpushim të menjëhershëm dhe tërheqjen e trupave ruse», në një kohë kur Rusia po përparon në qytete të shumta.
Presidenti i Ukrainës Volodymyr Zelensky ndërkohë bëri thirrje që Bashkimi Evropian t›i mundësojë vendit të tij anëtarësimin e menjëhershëm.
“Qëllimi ynë është të jemi së bashku me të gjithë evropianët dhe, më e rëndësishmja, të jemi në kushte të barabarta,” tha ai përmes një video. “Jam i sigurt se është e drejtë dhe e mundur”.
Por pranimi i Ukrainës në BE nuk është në axhendën e afërt.
Kështu deklaroi përfaqësuesi i Lartë për Politikë të Jashtme, Josep Borrell, para këshillit të jashtëzakonshëm të mbrojtjes, ndërsa paralelisht po mbahej takimi mes delegacioneve . “Ne duhet të japim një përgjigje për orët e ardhshme, jo për vitet e ardhshme”, shpjegoi Borrell, duke shtuar se “Ukraina ka një perspektivë të qartë evropiane”, por tani është koha për të “luftuar kundër agresionit”.
Paralelisht me takimin, nga SHBa u raportua se kanë ndaluar të gjitha transaksionet me bankën qendrore të Rusisë sipas departamentit të thesarit.
“Vendimi ngrin të gjitha asetet e mbajtura nga banka qendrore ruse në Shtetet e Bashkuara...”, thuhet në deklaratë.
Ndërkohë, Rusia mbylli qiejt për 36 vende përfshi edhe Shqipërinë ndërsa u intensifikuan bombat ruse në Kharkiv qytetin e dytë më të madh pas Kievit.
“dhjetëra civilë u vranë dhe qindra të tjerë u plagosën gjatë bombardimeve të rënda ruse në Kharkiv, Ukrainën lindore”, njoftoi në Facebook anton Herashchenko, këshilltar i ministrit të Brendshëm të Kievit.
trupat e Moskës, shton ai, bombarduan zonat e banuara me raketa Grad. Nga Rusia u raportua para takimit se ishte e interesuar të arrijë një marrëveshje që është në interes të të dyja palëve, referuar negociatorit rus Vladimir Medinsky, por nuk specifikoi çfarë konkretisht. Pamje nga jashtë e vendit ku zhvillohet takimi i dy delegacioneve ne kufirin ukrainas-bjelloruse.
Më herët, Zelensky kishte shprehur gatishmërinë që një delegacion i vendit të tij të takohej në kufirin UkrainëBjellorusi me një delegacion rus dhe ka paralajmëruar se situata është shumë e rëndë: “Janë orë vendimtare. Nuk kam ndonjë pritshmëri nga biseda, por ne do të takohemi dhe do të themi aty atë që mendojmë pa u lëkundur”.