KPK shkarkon edhe kryeprokuroren e Fierit, Violeta Shkurta nuk justifikoi dot problemet në pasurinë
Prokurorja Shkurta i kundërshtoi konstatimet e KPK-së për këtë kriter dhe deklaroi se pasuritë e saj janë krijuar me burime të ligjshme. Ajo dha informacione plotësuese dhe shkresa, por pa provuar atë ç’ka Komisioni kishte gjetur me ‘njolla të zeza’
Largohet nga sistemi i drejtësisë një tjetër magjistrat dhe konkretisht një nga më jetëgjatët, që e kishte nisur karrierën që nga viti 1989, para rënies së regjimit, si oficere gjyqësore. Prokurorja u gjet e pastër në kriteret e karrierës dhe pastërtisë së figurës nga KPK, por jo në atë të pasurisë. Shkurta tha se e ka vendosur ligjërisht, tashmë i mbetet edhe beteja në KPA për të shpëtuar karrierën. Prej vitit 2019 ishte komanduar si drejtuese në Fier
Një tjetër magjistrat i thotë ‘lamtumirë’ karrierës në drejtësi. Komisioni i Pavarur i Kualifikimit shpalli ditën e djeshme vendimin për shkarkimin e drejtueses së Prokurorisë së Fierit, Violeta Shkurta, për papajtueshmëri me të dhënat e referuara dhe të verifikuara nga raportet.
Gjatë seancave dëgjimore të zhvilluara më 24 nëntor 2021 dhe të premten më 25 shkurt, Komisioni konstatoi pamundësi financiare për krijimin e pasurive, si dhe vlerësoi të padrejtë përfitimin e një kredie të butë.
Prokurorja Shkurta i kundërshtoi konstatimet e KPK-së për këtë kriter dhe deklaroi se pasuritë e saj janë krijuar me burime të ligjshme. ajo dha informacione plotësuese dhe shkresa, por pa provuar atë ç’ka Komisioni kishte gjetur me ‘njolla të zeza’.
Pas riçeljes së hetimit në të tre kriteret, prokurorja Shkurta mori vlerësim pozitiv për pastërtinë e figurës dhe dha shpjegime për gjetjet në kriterin profesional. ajo deklaroi në seancën e të premtes se kishte vërtetuar se kishte arritur nivel të besueshëm në të tre kriteret e rivlerësimit.
trupa që kreu rivlerësimin e prokurores Violeta Shkurta kryesohej nga Firdes Shuli, me relator Olsi Komicin dhe anëtare Xhensila Pinen. tashmë magjistratja ka edhe një tjetër mundësi juridike dhe ligjore, në shkallën e dytë të apelit të KPa-së, për të rrëzuar vendimin e KPK-së dhe për të vijuar karrierën e saj të gjatë në drejtësi. Me këtë vendim, Shkurta do të qëndrojë për 15 vitet e ardhshme jashtë sistemit.
Violeta Shkurta e ka nisur karrierën si oficere e policisë gjyqësore në vitin 1989, pra përpara ndryshimit të sistemeve politike dhe punoi prej gati dy dekadash si prokurore në Prokurorinë e Fierit. Prej vitit 2019, Shkurta u promovua si drejtuese e përkohshme e Prokurorisë së Fierit, detyrë që e mbante edhe aktualisht, në momentin e shpalljes së vendimit.
Deri tani Vettingu ka kaluar në verifikim procedurial mbi gjysmën e magjistratëve në Gjykata dhe Prokurori, duke shkarkuar pjesën më të madhe të tyre, që i bashkohet edhe lista e të vetëpërjashtuarve me dorëheqje, që janë mbi 80 magjistratë.