Lejuan ndërtimin e pallatit pa leje në mes të qytetit, pas arrestimit të drejtoreshës shpallen në kërkim edhe 2 inspektorët e IMT-së

Gjykata e Tiranës ka dhënë masën e sigurisë “arrest me burg” në mungesë për zyrtarët Neriton Jano dhe Martin Arapi. Akuzë për shpërdorim detyre, në kërkim edhe biznesmeni Pando Papuçi. Dyshime nga Prokuroria se lejuan edhe ndërtimin e shtesave pa leje. Javën e kaluar u prangos drejtuesja Pulaj, që ndodhet në izolim pas operacionit të koduar “Heshtja”

Skandali me lejen e ndërtimit të një pallati shumëkatësh të paligjshëm në Sarandë dhe procedurat urbanistike, i kushtoi arrestimin javën e kaluar drejtoreshës së iMt-së në këtë rreth, Romina Pulaj, e cila ndodhet në paraburgim, me masën e sigurisë “arrest në burg”. Por nuk ka mbetur këtu Prokuroria me këtë dosje. Edhe 2 inspektorë në inspektoriatin Vendor të Mbrojtjes së territorit, pranë Bashkisë Sarandë, bëhet me dije se janë shpallur në kërkim për të njëjtën çështje, me akuzën “shpërdorim i detyrës”. Zyrtarët akuzohen për shpërdorim detyre, pasi lejuan ndërtimin pa leje të pallatit 7-katësh në Sarandë. Gjithashtu, nga informacionet shtesë dhe verifikimet paraprake, ata akuzohen edhe për lejimin e ndërtimit të disa shtesave pa leje në qytet. Burime zyrtare sqaruan se veprimet u kryen në kuadër të operacionit të koduar «Heshtja», referuar të dhënave për mosveprim nga ana e zyrtarëve për të ndaluar ndërtimet pa leje. U shpallën në kërkim Martin arapi, 30 vjeç dhe Nertion Jano, 26 vjeç, të cilën janë edhe me masë sigurie për ekzekutim, «arrest me burg» në mungesë, nga Gjykata e tiranës.

“Pas sigurimit të prova ligjore në lidhje me ndërtimin e paligjshëm të një pallati 7 katësh, ende të pa përfunduar, por edhe disa shtesa pa leje, në disa pallate në ndërtim, dy inspektorët dyshohet se me veprimet/mosveprimet e tyre kanë lejuar ndërtimet pa leje në zona të ndryshme në qytetin e Sarandës”, thuhet në njoftimin zyrtar. aktualisht prokuroria vendore po verifikon me informacione dhe dokumente, nëse provohet se zyrtarët janë përfshirë edhe në aferë korruptive.

Pak ditë më parë u la në burg kryeinspektorja e Mbrojtjes së territorit në Sarandë, Romina Pulaj. 31-vjeçarja u akuzua për shpërdorimin e detyrës, pasi nuk kishte marrë masa për pezullimin e punimeve në një objekt në ndërtim. Pallati 7-katësh, në hyrje të qytetit bregdetar, po ndërtohej nga biznesmeni Pando Papuçi, i cili gjithashtu është shpallur në kërkim dhe me masë sigurie në mungesë, për izolim në qeli, me akuzat ndërtim pa leje dhe falsifikime.