SHKB tjetër goditje në shenjë, gjen armatime edhe në Burgun e Fierit
Kontroll i befasishëm edhe në institucionin me kapacitet mbi 700 të paraburgosur dhe të dënuar. Gjenden në qeli një mjet prerës, një shtizë dhe një telefon të fshehur brenda lavatriçes në ambientet e të dënuarve dhe një celular dhe karikuesi në godinën e të paraburgosurve. Hetime për poseduesit dhe bashkëpunëtorët në radhët e gardianëve
Shërbimi i Kontrollit të Brendshëm të Burgjeve godet përsëri në shenjë dhe këtë herë në Burgun e Fierit. Pothuajse çdo operacion i befasishëm në institucionet penitenciare në vend kthehet me rezultate në zbulimin e sendeve të paligjshme apo lëndëve narkotike dhe aktiviteteve të dyshimta në qeli.
Sinjalet se në Burgun e Peqinit janë futur mjete të paligjshme për të burgosurit, ka sjellë një kontroll tjetër të drejtorisë së Burgjeve dy ditë më parë. dhe këtë herë në Burgun e Fierit me mbi 700 persona të izoluar si kapacitet, ku të dënuarve u janë gjetur një mjet prerës 15 cm e gjatë, një shtizë dhe një telefon.
Kontrolli ka vijuar edhe në godinën e paraburgimit, ku në ambientet e përbashkëta, brenda lavatriçes është gjetur një telefon celular. Karikuesi i këtij telefoni u gjet në po të njëjtën godinë, në ambientet e dusheve. Materialet i kaluan Shërbimit të Kontrollit të Brendshëm të Burgjeve për hetime të tjera. Edhe në fillim të muajit shkurt, SHKBB zhvilloi një megaoperacion në Burgun e Elbasanit, tiranës dhe Korçës, i koduar “trinomi”, ku si rezultat u shkarkuan një grup me zyrtarë të burgjeve, të dënuar ViP për krime të rënda dhe familjarë të tyre, që porosisnin nga qelitë trafikun e drogës brenda burgjeve, gjithsej 27 të arrestuar dhe rindaluar, pasi këta të fundit vuanin dënime të tjera të rënda. Sipas hetimeve, ky bashkëpunim mes shefave të policisë së burgjeve dhe të dënuarve e paraburgosurve, i kishte kthyer qelitë në vatra të drogës dhe organizimeve të paligjshme të lojërave të fatit.
të burgosurit ViP, si aleksandër Llanaj në sistemin e sigurisë së lartë “41 Bis”, Gazmir Braka, i njohur me emrin “Gaxhai”, Leo Osmani dhe delin Hajdari, arben Grori, Klajdi Gjeçi dhe aleksandër Sinanaj, akuzohen se bashkëpunonin me hallkat më të larta të burgjeve, mes tyre edhe shefi i policisë së paraburgimit në Elbasan, Hysni Ndreu, që u arrestua bashkë me 7 oficerë në burgjet e Elbasanit, Peqinit dhe drenovës.
Kontrollet e mëvonshme në drenovë, Burrel, e tiranë, kanë zbuluar gjithashtu sende të tjera të paligjshme, kryesisht ato elektronike të fjalës së fundit dhe armë të ftohta.