Lulzim Basha i tregoi prokurorëve belgë se kush ia dha informacionin për 3,4 mln euro
Edhe pse publikisht tha se nuk mund të dekonspironte hetimet e partnerëve belgë, mësohet se gjatë dëshmisë për dy orë në SPAK më 10 shkurt, para 7 hetuesve të huaj, kryedemokrati ka thënë se informacioni i erdhi me një letër anonime, nga një qytetar. A u këshillua nga juristët të shprehej kështu, për të shmangur përgjegjësinë juridike dhe penale, si një ‘shteg’ shpëtimi për përballjen me drejtësinë? Ndryshe nga hetimet e Shqipërisë, që u mbyllën me ‘fluskë sapuni’, Brukseli vijon hetimet ndaj organizatës shqiptare
Kryedemokrati Lulzim Basha zbulohet se ka rrëfyer gjithçka dinte për dosjen “toyota Yaris” tek grupi i prokurorëve dhe oficerëve belgë, që zbarkuan për një javë në Tiranë, gjatë muajit shkurt. Kryetari i Partisë dmokratike dëshmoi më 10 shkurt për rreth dy orë me radhë, lidhur me çështjen, teksa mësohet se ka rrëfyer tek hetuesit pas herës së dytë që u mor në pyetje, se çfarë dinte dhe se nga kush e kishte marrë informacionin, para se operacioni për kapjen e 3,4 mln euro të zhvillohej nga policia dhe të dekonspirohej në Parlament prej tij.
Burimet të rezervuara dhe që nuk duan të identifikohen për median, bënë me dije se Basha ka dëshmuar se informacionin e kishte marrë nga një letër denoncuese, e ardhur nga qytetarët. I pyetur nëse ka një protokoll për mënyrën e marrjes së denoncimeve, ai është përgjigjur se nuk ka një gjë të tillë. Ndoshta një justifikim kjo për t’i shpëtuar edhe përgjegjësisë juridike, e këshilluar nga njerëzit e tij më të afërt, pasi duke thënë se letra ishte anonime, nuk do të mbante direkt përgjegjësi penale për dekonspirimin që i bëri operacionit të përbashkët Shqipëri-Belgjikë, në vitin 2018.
“Qytetarët e informojnë Partinë
Demokratike për shumë çështjeje, një ndër të cilat është edhe informacioni për shumën e konsiderueshme të parave te sekuestruara në Portin e Durrësit, qershorin e vitit 2018”, është shprehur Basha përpara hetuesve belgë, katër vite pas ngjarjes. Seanca shtesë e marrjes në pyetje kishte më shumë lidhje me hetimet shtesë që Belgjika po zhvillon ndaj organizatës shqipfolëse në Bruksel, që drejton trafiqet e drogës dhe kontrabandën e parave.
Tre prokurorë, 2 oficerë dhe një shef policie nga Belgjika, janë takuar me prokurorë të SPAK dhe të Prokurorisë Tiranë, pikërisht për zbardhjen e kësaj dosje, ndërsa u larguan pas një jave, duke lënë edhe detyra për homologët shqiptarë.
Në një prononcim për mediat, pasi doli nga ambientet e SPAK, Basha tha se “drejtësia belge është e vendosur t›i shkojë deri në fund kësaj çështjeje dhe se ai do të ndihmojë në këtë drejtim «duan apo nuk duan ‹non grata-t› e shpallur dhe të pashpallur deri më tani”. Por shtoi se nuk mund të jepte detaje se kush ia dha informacionin, pasi do të ishte dekonspirim i hetimit, ndërkohë që nuk ‘përtoi’ ta dekonspironte operacionin në parlament katër vite më parë. Në Shqipëri, dosja ka përfunduar tashmë në një “fluskë sapuni’, teksa ka vetëm një të dënuar modestisht nga drejtësia me 1 vit burg, Ervis Vladi, kurse të tjerët i shpëtuan përgjegjësisë, edhe pse pati të paktën 6 të pandehur. Paratë u fshehën në një nga mjetet “Toyota”, që transportoheshin nga Gjermania për në Shqipëri me një trajler të posaçëm dhe me qëllim tregtimin nga një kompani e madhe në Tiranë. Por origjina e kontrabandës së parave, që dyshoheshin se i përkisnin një karteli shqiptar të drogës në Londër, ishte pikërisht Belgjika. Aty zhvillohen hetime të tjera për të paktën 12 të pandehur shqiptarë, që në të kundërt të Tiranës ku hetimet dështuan, rrezikojnë shumë vite izolim.