Nisin javët e ‘zjarrit’ për futbollin, dy ndeshje kalendari brenda javës, Partizani luan klasiken dhe dhe derbin

Superliga shqiptare hyn në muajt e ‘ferrit’. Nuk ka kohë as për të rikuperuar forcat për skuadrat e Abissnet Superiore. Ngjeshja e kalendarit i detyron protagonistët e elitës së futbollit shqiptar, që të zbresin në fushë në mesjave dhe sërish në fundjavë. Java e 23-të do të shtrihet në dy ditë, të mërkurë dhe të enjte (sot dhe nesër), me sfida tërheqëse dhe me përplasje objektivash. Sot zbresin në fushë, në të njëjtin orar (16:45), si Tirana dhe Partizani, për të mos pasur asnjë objeksion sa i përket kohës që u duhet për të rikuperuar forcat, pasi javën pasardhëse do të përplasen në derbin e kryeqytetit. Tirana do të luajë në transfertë me Teutën, me synim krijimin e një distance më të sigurt me ndjekësit më të afërt, ndërsa Partizani pret Kukësin në një duel mes rivalësh, pasi të kuqtë synojnë të parakalojnë në renditje pikërisht verilindorët, për të synuar vendin e tretë, ku në garë është edhe Vllaznia. Të enjten, do të luhen tri sfida, në dy orare të ndryshme. Në 13:45, Kastrioti pret Skënderbeun në një duel mbijetesë, ndërsa Laçi pret Egnatian, me objektivin për të harruar sa më parë disfatën e rëndë përballë Tiranës. Java e 23-të mbyllet me takimin e orës 16:45, Vllaznia – Dinamo, një sfidë që pritet të dhurojë emocione, pasi barazimi nuk do t’i bënte punë askujt. Trajneri i “të kuqve”, Dritan Mehmeti, u shpreh se skuadra e tij është penalizuar shumë nga gjyqtarët. “Gabimet në sulm s’na lejohen më! Nuk na falet, kemi shpërdoruar shumë. Të kesh në shumë ndeshje mundësi realizimi të golit, siç ka ndodhur sëfundmi, dhe të mos konkretizosh është e vështirë. Duhet të mos kemi problem përsa i përket realizimit”, deklaroi ai. Kurse tekniku i kryesuesve, Orges Shehi, tha se i trembet Teutës. “Futbolli është me periudha, jo gjithmonë fiton ndaj çdo kemi dalë fitimtarë. Teuta, pavarësisht pozicionit, është kampione në fuqi, ka lojtarë cilësorë. Shpresoj të jemi në vazhdën e këtij sezoni. Fitorja me Laçin ka përfunduar, përqendrimi ynë është pikërisht te kjo ndeshje”, tha tekniku bardheblu. Tirana kryesuese pas 22 ndeshjesh është në kuotën e 49 pikëve, 6 më shumë se Laçi ndjekës.

NDESHJET E JAVËS SË 23-TË NDESHJET SOT: Teuta-Tirana Partizani-Kukës

NDESHJET NESËR: Kastrioti-Skënderbeu Laçi-Egnantia Vllaznia-Dinamo