Ambasadori serb në OKB dhe pyetja pa përgjigje: NATO ndërhyri pas gjenocidit serb, po Ukraina çfarë i bëri Rusisë?

ambasadori serb në OKB ka dalë në një deklaratë, ku “sqaron” pse vendi i tij nuk ishte dakord me të gjitha pikat e rezolutës kundër agresionit rus në Ukrainë. “Republika e Serbisë është e përkushtuar që të respektojë parimet e integritetit territorial dhe pavarësisë politike të shteteve, si një nga parimet bazë të së drejtës ndërkombëtare të përfshira në Kartën e Kombeve të Bashkuara dhe Aktin Final të Helsinkit (1975), të cilat garantojnë të drejtën e shteteve për paprekshmërinë e kufijve”, thuhet në deklaratë.

Më pas ambasadori i kujton OKB se nuk mori një iniciativë të ngjashme kur Serbia u sulmua nga NATO, duke i kërkuar OKB-së që qëndrimin e mbajtur sot ndaj Rusisë, ta kishte mbajtur edhe ndaj NATO nē ’99, duke e hequr kësisoj veten viktimë agresioni si Ukraina sot

“Unë jam i detyruar të vë në dukje dhe të kujtoj se sulmi i parë kundër një shteti sovran në tokën e Evropës pas Luftës së Dytë Botërore ka ndodhur jo shumë kohë më parë, në vitin 1999, kur 19 vende sulmuan, në atë kohë Republikën Federale të Jugosllavisë.

Nuk pati asnjë reagim të duhur nga OKB për shkeljen flagrante të Kartës së OKB-së. Republika e Serbisë do të vazhdojë të kërkojë ndërprerjen e konflikteve, duke pritur që palët të bëjnë përpjekje shtesë për arritjen e zgjidhjes diplomatike”, – tha zyrtari serb.

Është e disata herë që nga Serbia përmendet Kosova dhe ndërhyrja e NatO-s, kur pyeten për agresionin rus në Ukrainë.

Duke i kërkuar OKB-së që qëndrimin e mbajtur sot ndaj Rusisë, ta kishte mbajtur edhe ndaj NATO nē ’99, Serbia e heq kësisoj veten viktimë agresioni si Ukraina sot. Kur në fakt ishte agresore dhe gjenocidiale.

Beogradi në spërdredhjet e veta mbi këtë temë anashkalon pikërisht faktin që NatO ndërhyri pas masakrave dhe gjenocidit serb mbi popullsinë shqiptare të Kosovës. Ukraina çfarë i ka bërë Rusisë?