Mbyllet fushata për zgjedhjet në 6 bashki; Rama dhe Basha thirrje votuesve nga Shkodra
Rama kërkon votë për ‘pastrim’, Basha votë për të çarë rrethimin e së keqes
Edi Rama dhe Lulzim Basha mbajtën takimet përmbyllëse të fushatës për zgjedhjet e pjesshme vendore thuajse në të njëjtën kohë në Shkodër.
Kryeministri kërkoi që Shkodra t’i besojë për herë të parë Partisë Socialiste, qoftë edhe për një vit për të ndjerë e provuar, siç tha ai, forcën e ndryshimit që është ndërmarrë edhe në bashkitë e tjera të vendit.
“Të gjitha bashkitë kanë ecur përpara, kush më pak e kush më shumë, por të gjitha kanë ecur përpara. Vetëm Shkodra jo”, tha ai.
Për ta ndryshuar këtë, kreu i Qeverisë kërkoi votën dhe tha se përballë kandidatja e PS-së nuk ka asnjë alternativë, ndërsa ftoi edhe demokratët që të mbështesin.
“Më 6 mars nuk do shkojmë të zgjedhin mes alternativash politike, nuk do shkojnë të zgjedhim mes Europës dhe SHBA apo SHBA dhe interesave të njërit apo tjetrit. Më 6 mars qytetarët do zgjedhin për ta pasur qytetin më të pastër, apo më të pisët, për të pasur më shumë vëmendje për lagjet e tyre, apo për të vazhduar mes gropave që zgjerohen dhe shtohen në lagjet e tyre”, tha Rama.
“Ata, tha Rama duke iu referuar Berishës e Bashës, do marrin votat këtu dhe do të mburren në Tiranë që unë jam i pari, unë jam më i forti”, u shpreh ai.
Basha nga ana tjetër e përqendroi me
sazhin e tij rreth kandidatit Xhemal Bushati dhe Shkodrës. Ai tha se në 8 vite Shkodra është rrethuar nga e keqja dhe harresa dhe ftoi qytetarët që të votojnë kandidatin e PD-së për ta çarë këtë rrethim.
“Me 6 mars këtë energji që kemi mbledhur ditë pas dite, orë pas ore, ta derdhim vrullshëm, askush të mos qëndroje mënjanë. Të gjithë bashkë për të çarë dhe njeherë rrethimin e të keqes, për
ti dhënë Shkodres dhe nga Shkodra gjithë Shqipërisë, shpresen dhe besimin tek e nesërmja që po vjen tek ndryshimi që po vjen dhe që nuk ka forcë që ta ndalë”, shtoi ai.