Një muaj nga ngritja, aMP prangosi 4 policë dhe një gardist
Agjencia për Mbikëqyrjen Policore nisi punën në fillim të shkurtit. Për një muaj ka pasur 208 ankesa për të gjitha sektorët. Nga shpërdorimi i detyrës, te përfshirja në grup të strukturuar kriminal, kush janë 4 efektivët e arrestuar. Mbizotërojnë ankesat për policët e rendit dhe qarkullimit rrugor
agjencia për Mbikëqyrjen Policore, (AMP), e cila zëvendësoi ish-SHKB dhe ish-SHÇBA në rend ndjekës, e nisi punën në muajin shkurt, në një bilanc katërjavor me pesë persona të arrestuar, konkretisht katër prej tyre punonjës policie, të cilët akuzohen për shpërdorim detyre dhe njëkohësisht një punonjës i Gardës së Republikës. Gjithashtu ka pasur 89 ankesa për Policinë e Rendit, 64 për Policinë Rrugore, 43 për Hetimin ndaj Krimit, 3 për Burimet Njerëzore, 8 për Kufirin dhe 1 për Gardën.
Rei Proko, 25 vjeç, efektiv policie, duhej të shmangte përfshirjen e të miturve në aktivitete kriminale, por bëri të kundërtën. Efektivi u arrestua pas një denoncimi të një gruaje, e cila raportoi vjedhjen e një miniskuteri në “Rrugën e Barrikadave”. Nga hetimet rezultoi se Proko kishte shtyrë një të mitur për vjedhjen e mjetit, që më pas u gjet në makinën e tij tip “Opel Corsa”.
Pas kësaj ngjarjeje, 3 efektivë u arrestuan në Kukës, të akuzuar për grup të strukturuar kriminal, pasi lehtësuan punën për kalimin e makinave të vjedhura nga Kosova, drejt vendit tonë, pa i regjistruar në Pikën Kufitare të Morinës. Bëhet fjalë për trafikimin e mjeteve motorike me targa false.
Kurse pak ditë më parë, agjencia e Mbikëqyrjes Policore arrestoi edhe punonjësin e Gardës së Republikës, Dashamir Kurti. 44-vjeçari ishte në gjendje të dehur, ndërsa u konfliktua fizikisht me pronarin e një lokali, të cilin po ashtu e kanosi me armën e shërbimit.
Ky nuk ishte rasti i vetëm. Pak ditë para ngjarjes, efektivi ishte konfliktuar edhe me persona të tjerë, çfarë çoi deri në arrestimin e tij. Që nga dita e parë e muajit shkurt, kjo agjenci referoi në prokurori 19 punonjës policie, të përfshirë në 10 ngjarje. Gjatë kësaj peri
udhe, janë trajtuar edhe 208 ankesa të ardhura nga qytetarët, ku dominojnë ato për Policinë e Rendit, ndjekur nga Policia Rrugore dhe Hetimi ndaj Krimit. AMP do të ketë përgjegjësi ligjore dhe proceduriale më të mëdha nga ato që pati SHÇBA më herët
apo SHKB-ja dikur. Në këto hapësira përfshihen edhe ndjekja dhe hetimi i uniformave blu, Gardës apo punonjësve të Ministrisë së Brendshme, si dhe survejimi, përgjimi ambiental dhe telefonik për përfshirje në grupe të organizuara kriminale.