Drejtësia i mbyll çdo shteg Armand Dukës, 3 muaj pezullim, zgjedhjet e 15 marsit janë nul
Gjykata e Tiranës merr vendimin e shtatë radhazi kundër presidentit në detyrë të pezulluar të futbollit, në më pak se një muaj. Duka s’ishte i pranishëm, avokati e quajti masën të paligjshme. Gjykata pranoi argumentet e prokurorit Agovi, se kreu i futbollit ka kryer dy vepra penale; falsifikim dokumentesh dhe shpërdorim detyre. E njëjta masë për Haçin dhe Shulkun. Akuzohen se manipuluan zgjedhjet e 24 janarit për Shoqatën e Tiranës, delegatët dhe federimet. Zgjedhjet e shtyra për më 15 mars nga Duka dhe të tijët, pa asnjë vlerë juridike
Gjykata e Tiranës mori dje vendimin e shtatë radhazi kundër Armand Dukës, FSHF-së ku është president në detyrë i pezulluar dhe vartësve të tij. Drejtësia i ka mbyllur përfundimisht të gjitha shtigjet ligjore dhe juridike kreut të federatës, duke u shprehur dje se për 3 muajtë e ardhshëm s’ka të drejtë të kryej asnjë veprim administrativ apo zgjedhor, pasi firma e tij nuk do njihet juridikisht, sikurse edhe çdo vendim që do të marrë. Në seancë Duka nuk ishte i pranishëm, teksa avokati i tij, Julian Mërtiri e konsideroi të pakuptimtë masën e sigurisë ‘pezullim nga detyra’ për të.
Shkak është marrja nën hetim dhe si i pandehur në gjendje të lirë, nga Prokuroria e Tiranës, për veprat penale të falsifikimit dhe shpërdorimit të detyrës, në lidhje me skandalin e manipulimit të delegatëve për zgjedhjet e anuluara të 2 Marsit, si dhe ato të Shoqatës së Tiranës. Pavarësisht se Duka mblodhi ‘kadetët’ e tij pak ditë më parë në Asamble dhe votoi 15 marsin si datë të re për zgjedhjen e vetë në mandat të gjashtë e më tej të strukturave, nëse ato do të mbahen do të konsiderohen nul dhe pa fuqi ligjore. E vetmja shpresë për Dukën mbetet Apeli nëse vendimin e djeshëm do e ankimojë dhe rrëzojë në shkallën e dytë. Por duket e vështirë që me shtatë vendime radhazi në një muaj kundër tij, që provojnë shkeljet e panumërta për të cilat është kallëzuar, drejtësia ta ndryshojë verdiktin e shkallës së parë. Gjithashtu masa e pezullimit mbeti në fuqi edhe për sekretarët e tij në FSHF, Ilir Shulku dhe Ardian Haçi. Asnjëri prej tyre nuk u paraqit në seancë, duke iu shmangur organeve të drejtësisë, teksa ishin avokatët mbrojtës.
Në këtë mënyrë, gjykata ka vendosur që zgjedhjet e caktuara nga Armand Duka janë të pavlefshme, duke pezulluar drejtuesit dhe organizatorët e këtij procesi me të paktën 3 muaj. Prokurori u shpreh se pezullimi i Armand Dukës, Ilir Shulkut dhe Ardian Haçit është i domosdoshëm për gjatë këtij procesi janë konstatuar një sërë parregullsish. Gjithashtu kërkoi dhe praninë fizike të drejtuesve të FSHF, për të dhënë sqarime në lidhje me hetimet për manipulim dhe parregullsi të tjera, në lidhje me procesin zgjedhor. “Është nisur hetim lidhur me një sërë parregullsish të dyshuara si të konsumuara në mbledhjen e datës 24 janar. Pas administrimit të vendimit për “pezullim nga detyra”, prokuroria e ka zbatuar masën përmes policisë gjyqësore, duke i njoftuar shtetasit. Vendimi iu është bërë me dije personave. Ne si prokurori kërkojmë vijimin e masës së sigurimit “ndalim i përkohshëm i ushtrimet të detyrës”, u shpreh prokurori i Tiranës, Arben Agovi.
Ndryshe nga 5 vendimet e mëparshme, që kanë qenë të karakterit civil, dy të fundit, përfshi dhe të djeshmin, ishin penale. Madje, përmbaruesit zbarkuan pak ditë më parë në zyrat e Federatës Shqiptare të Futbollit, për të ndaluar asamblenë që ishte parashikuar për në 2 mars, e cila me vendim të Gjykatës u pezullua. Gjykata pranoi kërkesën për sigurimin e padisë duke urdhëruar përmbarimin për ekzekutimin e vendimit.
Vendimi u dha nga kryesuesi Artan Gjermeni, që edhe më herët ka dhënë masën e pezullimit dhe konfiskimeve. Gjykata urdhëroi pezullimin e efekteve juridike të vendimit nr.1, datë 10.01.2022 të Komisionit të Verifikimit të FSHF-së, si dhe të çdo veprimi apo akti tjetër të dalë në zbatim të këtij vendimi, për realizimin e mbledhjes së asamblesë së përgjithshme të zakonshme zgjedhore të FSHF-së, të datës 02.03.2022, deri në zgjidhjen e konfliktit me një vendim të formës së prerë. Kundërshtimi i zbatimit të saj, sipas gjykatës përbën vepër penale, duke paralajmëruar drejtuesit e lartë të FSHF-së me ndjekje penale dhe deri në 3 vite burgim.
“Ende nuk e kuptojmë pse është marrë kjo masë sigurie pasi kallëzimi ka qenë për Shulkun e Haçin, por masa është marrë ndaj Dukës. S’ka asnjë element të veprës penale të falsifikimit. Procesi i zgjedhjeve në Shoqatën Tirana ka qenë transparent dhe kjo është e vërtetuar”, ka thënë avokati Mërtiri gjatës seancës.
Ndërkohë, dy ditë më parë me gjithë vendimin e Gjykatës së Tiranës që pezulloi Asamblenë e Zakonshme Zgjedhore të Federatës Shqiptare të Futbollit, Armand Duka mblodhi institucionin që organizon zgjedhjet për kreun e Federatës, proces në të cilin Duka kërkon një mandat të gjashtë. Në zyrat e Federatës Shqiptare të Futbollit, Duka propozoi shtyrjen e zgjedhjeve për kreun e ri të FSHF-së dhe anëtarët e komitetit ekzekutiv, nga data 2 mars, për në 15 mars. Por me këtë vendim Gjykate, edhe këto zgjedhje janë të pavlefshme.