KQZ: Probleme me shpërndarjen e materialeve në Shkodër; në Vorë fituesi mësohet brenda së dielës
Komisioni Qendror i Zgjedhjeve nuk ka një numër të saktë të votuesve të gjashtë bashkive ku do të mbahen zgjedhjet e pjesshme vendore të dielën, të cilëve u kanë skaduar mjetet e identifikimit, por komunikoi se edhe këta persona do të lejohen që të votojnë pas miratimit të një akti normativ nga Qeveria që shtyu vlefshmërinë e tyre edhe për këto zgjedhje.
“Sa votues potencial nuk kanë asnjë dokument identifikimi, këtë informacion nuk e kemi dhe duke u nisur nga shqetësimi ja adresuam këtë kërkesë Qeverisë për të shtyrë vlefshmërinë e kartave të identitetit”, deklaroi Komisioneri Shtetëror i Zgjedhjeve, Ilirjan Celibashi në një konferencë për shtyp.
Sipas përcaktimeve të Kodit Zgjedhor, mjetet e identifikimit për të votuar janë dy; pasaporta dhe karta e identitetit.
Celibashi tha se shpërndarja e materialeve zgjedhore ka vijuar pa probleme, me përjashtim të zonave të thella të Shkodrës, Shala, Pultit dhe Thethit, ku pengesë janë bërë kushtet atmosferike. Kreu i KQZsë u shpreh se ka pasur një kërkesë nga Voltana Ademi që këto vendvotime të transferoheshin në rrethinat e Shkodrës, por megjithëse e cilësoi kërkesën të drejtë, tha se ajo u rrëzua për shkak se nuk kishte bazë ligjore.
Sipas Celibashit, ligji ndalon zhvendosjen e qendrave të votimit në një distancë më të madhe se 50 kilometra dhe tha se kjo problematikë duhet të adresohet në reformën e radhës zgjedhore. Në Vorë, ku do të aplikohet votimi elektronik, Celibashi tha se rezultati pritet që të dalë brenda orës 20:00 të së dielës. Ai garantoi votuesit se votimi elektronik është i sigurtë.
“Është një proces që garanton 100 për qind sigurinë e votës dhe nuk ka asnjë shkak apo pretekst për dikë që të dyshojë dhe vendosë në diskutim sigurinë e këtij procesi. Qytetarët të marrin pjesë në votimit dhe të mos kenë asnjë droje. Në vorë rezultati del para orës 20:00, në bashkitë e tjera brenda 48 orëve, ndoshta edhe më shpejt sepse kemi numër të kufizuar kandidatësh, që nuk kërkon shumë kohë për numërim”, u shpreh ai.
Kreu i KQZ-së tha se për fushatën ka dy shqetësime të prezantuara nga PD në lidhje me veprimtaritë publike të zhvilluara nga administrata një në Durrës dhe një në Rrogozhinë. Për të dyja rastet, deklaroi ai, KQZ ka nisur hetimin administrativ.