HALLET E KRYEMINISTRIT, NUK JANË EDHE HALLE TË POPULLIT

Kohët e fundit kryeministri ynë shumë të reja na sjell, e trash përditë e më shumë zërin, i ndërron modelet e potureve përherë, e mba pranë avionin (si dikur narqotët gomarët), nxiton të takojë më shumë udhëheqës të botës së madhe e të bëjë sa më shumë miq, të thotë edhe ai fjalën e tij, t’u tregojë për planet që ka për vendin etj. Nxiton të baltosë LANÇ dhe gjithçka të mirë të periudhës së socializmit, të bashkëbisedojë me popullin, të shpalosë platformat e tij për zhvillimin, të hapë tunele e të bëjë me aeroporte çdo qytet... Nxiton të ligjërojë kanabisin që dje e ka pasë kundërshtuar e jo pak njerëz vuajnë dënimin. Për atë kanabis dikur prishi edhe miqësinë me njërin nga miqtë e tij. Nuk dihet me saktësi se ç’e ka shtyrë, po një hall të madh ka. Mbase kërkon të jetë ai autor i sa më shumë ndodhive që do të mbeten gjatë në kujtesë. Mbase dëshiron të tregojë se historia e Shqipërisë lulëzon vetëm me atë. Mbase parashikon të gradohet, mbase këtë nxitim e ka si arkë shpëtimi që të mbrohet. Mbase e kanë urdhëruar të tjerë që komandojnë gjithë këta kalanderë .... Rëndësi ka që nxiton. Nxiton për atë që ai dëshiron dhe hesht e mashtron për atë që populli kërkon. Si për shumë gjëra të tjera, nxiton edhe për legalizimin e kanabisit. Dhe ai për të qenë në rregull me të tjerët e dallon kanabisin mjekësor nga ai helmues, si dikur kanabisin nga kërpi. Mbase do të organizojë edhe ndonjë akademi për ta dalluar njërin nga tjetri. Po atë e ka vënë edhe në ballë të ‘’konsultimit popullor’’ për të ‘’marrë mendime’’ prej të tjerëve, edhe se vetë shtron pyetjen, vetë jep edhe alternativat, vetë jep edhe mendimin sundues. Mendime për atë që ai në kokë e ka vendosur, po shqiptarët dhe mbarë opinioni të jenë të përgatitur para se sa ta ligjërojë. Mbase e ndjen se borxhet e shtetit janë shtuar aq shumë sa kanabisin e shikon si shpresë, mbase për të përballuar vështirësitë e luftës që bëhet në botë. Mbase i ka hipur në tru që të jetë i pari që e hedh një hap të tillë në Ballkanin tonë të trazuar. Shumë hamendësime, po një e vërtetë. Po a e dini se nuk e ka keq? Ja kushdo që e legalizoi kanabisin ka fituar miliarda dollarë për një kohë të shkurtër. Po edhe kryeministri i nuk ka mbetur pa gjë. Dhe ka prej atyre që duan të ndjekin shembullin e kryeminstrit tonë. Jo vetëm kaq, po kohët kanë ndryshuar, ndryshojnë edhe mendimet, jeta provon përvoja të tjera. Mendoi se turizmi do ta bënte vendin konkurrues në Ballkan, po kjo lufta Rusi- Ukrainë e prishi terezinë. Jo vetëm kaq, po dhe turizmi të pëlcet shpirtin për të arritur një farë fitimi, shpenzon shumë e fiton pak, kurse kanabisi ta jep atë më të plotë e pa shumë mundime. Kryeministri na thotë se do ta kultivojnë bimën helmuese vetëm ata që fitojnë tenderin. Po dihet se kush i fiton tendera të tillë dhe nuk besoj se e ka harruar se sa ishte ‘’i zoti’’ ta ndalonte në vitin 2016 e sa në vijim, sa mundet ta ndalojë eksportin e kësaj bime me tonelata çdo vit e sa njerëz janë në qelitë e burgjeve për atë helm që tani do ligjërohet. Sloganet e propaganda kanë vlerë vetëm për të hedhë popullit hi syve, jo më tepër. Me legalizimin e kryeministrit do të mbushen jo vetëm kodrat e vendet e fshehura, po edhe fusha, shumë sera do të heqin dorë nga perimet.

Paçka se me legalizimin e kësaj bime do të ketë më shumë çyrykë e ulokë, më tepër të pandërgjegjshëm, më shumë njerëz që do të shtrihen rrugëve, më tepër lypësa që zgjasin dorën për lekë për të blerë helmin e tyre të preferuar, që do ta gjejnë jo vetëm në rrugica të errëta, po edhe në farmaci. Shumë kërkesa ka në kokë kryeministri ynë për bashkëbisedim, po atij as që i shkon në mendje të bashkëbisedojë me banorët e të kërkojë prej tyre si të sigurohet buka në vend(edhe se e ka përpara syve luftën dhe pasojat e saj), si t’u kthehet nafta shqiptarëve( që këto ditë kryeministri ynë na thotë se nuk ndërhyn në çmime, se qenka ekonomi tregu. Pse për të na thënë këto qëndron në krye? Për të mësuar këtë të vërtetë u ndryshua sistemi e brohoritëm për sistemin e ri?) Asgjë nuk na thotë si të sigurojnë kokën shqiptarët në rast agresioni, si të frenojë emigracionin galopant të shqiptarëve, si të nxisë rritjen e popullsisë në vend me shqiptarë e jo me emigrantë, si të rritet e të përmirësohet jetesa e qytetarëve jo thjesht e vetëm e pronarëve etj të kësaj natyre. Ndaj kërkesa për të mos u nxituar është më se aktuale. Na duket me vend thirrja: Edhe tunelet, edhe aeroportet, edhe çdo gjë të mirë për vendin, na i trego, po në radhë të parë mos na le në rrugë të madhe, hidhe hapin më shtruar që punët të dalin qëruar!