U gjetën 119 kg kokainë në kamionin me banane, Apeli rikthen masën me burg për biznesmenin Marson Murataj
Ka zgjatur më pak se një muaj dalja nga qelia për Marson Murataj, i njohur si menaxheri i “Zico SHA”, kompanisë së importit të bananeve, në të cilën u gjetën 119 kg kokainë pak javë më parë.
Më 5 shkurt 2022, gjykata e shkallës së parë caktoi ndaj tij arrest në shtëpi, ndërsa pas ankimimit të Prokurorisë, Apeli dje e ka vendosur të rikthehet në qeli dhe Policia ta ekzekutojë vendimin e formës së prerë. Ndërkohë, dy personat e tjerë të arrestuar, Gëzim Kalaja dhe shoferi Hasan Salihu, janë në qeli. Droga është zbuluar në një magazinë në zonën e Vaqarrit, më 30 dhjetor. Kamioni me 119 kg kokainë në arkat me banane, doli i pastër në skanerin e Durrësit dhe kjo bëri që dy punonjës të portit, njëri agjent i AKU-së, Bujar Qurku dhe tjetri doganier, Julian Merhori, të arrestohen për mosndjekjen e procedurave të kontrollit të kontenierit me banane dhe janë lënë në “arrest shtëpie”. Shoferi Hasan Salihu u rrëfeu administratorëve Murataj prej 28 dhjetorit se ishte sulmuar në Hamallaj nga katër persona të veshur me maska e tesha si të policisë, që zbrazën ngarkesën dhe më tej e kërcënuan nga familja. Një ditë më pas administratorët kërkuan ndihmën e Policisë së Shtetit, por kontrolli më 30 dhjetor zbuloi se gjendeshin 119 kg kokainë e ardhur me anijë nga Ekuadori. Trifon Murataj, pronari i kompanisë ka thënë se nuk kishte dijeni për ngarkesën. Por Prokuroria po heton nëse denoncimi nga administratori u bë pasi i grabitën një sasi të madhe ngarkese apo se vërtetë kanë qenë të papërfshirë. Gjithashtu po hetohet se kush ishin personat që kryen grabitjen me maska dhe se çfarë morën nga kamioni i firmës.