Rama për krizën: Do të ketë edhe ditë që do punojmë nga shtëpia
Ditë pa makina, punë nga shtëpia, kompensim për transportin. Të gjitha çfarë tha dje kryeministri, në kuadër të masave që po merren në përballimin e krizës
Duke folur për krizën, kryeministri Edi Rama deklaroi se dita e hënë do të bëhet pushim si një masë për të kursyer karburant.
Më herët, Rama ka thënë se ka edhe një draft për përballimin e krizës, duke thënë se ditët e hëna do të jenë pa makina dhe kjo për të kursyer.
Përveç të hënës pushim, Rama shtoi se do të ketë edhe ditë ku do të punohet nga shtëpia në mënyrë që të kursehet më shumë.
“Do bëjmë një tjetër mbledhje që ta bëjmë ditën e hënë pa makina. Nëse do vendosi kështu. E do vijë gradualisht, sigurisht. Ajo që agjencia thotë. E diela pa makina thonë ata për të kursyer, jo për ekologji. Ose mund të flasim për tre ditë mos vajtje në punë nga shtëpia të punohet, si me Covid. Disa pika të tjera ka plani”, tha Rama.
Rama me shoqatën e transportit: Ndërhymë për të mbrojtur ata që përdorin autobusin
Kryeministri Edi Rama ka zhvilluar dje një takim me përfaqësues të shoqatës së transportit për të prezantuar Paketën e Rezistencës sociale, për këtë kategori.
Kreu i qeverisë tha se qeveria ndërhyri për të mbrojtur qytetarët që e kanë të domosdoshëm përdorimin e transportit publik. Rama tha se u vendosën në dispozicion 500 milion lekë dhe qëllimi kryesor ishte të mos rritet çmimi i biletës.
“Masa tjetër e mos prekjes së taksave të natës kërkon ndërhyrje për ata që përdorin transportin publik. Dhe me një rritje të çmimit të biletës që do të ishte e padëshirueshme për publikun dhe do ti cenonte prapë se prapë kapacitet juaj për të rezistuar do të ishte i dobët. Dhe për këtë arsye ne vendosëm 500 milion lekë për të suportuar diferencën dhe për t’ju kërkuar juve që të mos prekni në këtë fazë kaq delikate çmimin e biletës.
Është shumë e rëndësishme
që të vazhdojë shërbimi. Teksa po vija këtu pashë që agjencia ndërkombëtare energjisë kishte dalë me një lajm, që nuk është pozitiv, që problemi në këtë situatë nuk është kaq sa duket. Sepse ndërkohë që diskutojmë çmimet, rreziku me naftën apo energjinë është mungesa. Ka paralajmëruar mundësinë e shokut më të madh të furnizimit me naftë në dekada”, tha Rama.
“Ne këtë fond e kemi vendosur dhe Gonxhe e ka përshëndetur i pari këtë. Do ta vëmë në dispozicionin tuaj. Sektori juaj do të ishte në kushtet e një kolapsi total. Ne na intereson që të gjithë njerëzit që përdorin autobusin të mos ketë probleme.
Ndërkohë duhet të bisedojmë për një strategji afatmesme që të rrisim kapacitete e transportit publik, sidomos për atë urban”, shtoi Rama.