Rritja e çmimeve, grupi iniciator paralajmëron përshkallëzim të protestave: Masat nuk mjaftojnë
Para protestës së planifikuar të shtunën (19 mars 2022) në orën 11:00 para kryeministrisë në Tiranë kundër rritjes së çmimeve, organizatorët kanë kërkuar nga qeveria që të reagojë ndaj kërkesave të tyre.
Në një deklaratë për mediat, ata kanë paralajmëruar se do të zhvillojnë protesta që edhe mund të përshkallëzohen, duke bllokuar rrugën dhe protestuesit do të ulen në tokë.
“Këto masa nuk janë të mjaftueshme për përballimin e krizës. Ndihma për përballimin e rritjes së çmimeve për kategorinë në nevojë është shumë minimale. Ndërkohë, qeveria vazhdon të refuzojë uljen e përkohshme të taksave, - shprehet një nga aktivistet, Rezarta Çaushaj. - Nëse qeveria është kokëfortë dhe nuk pranon të negociojë, këtë të shtunë qytetarët do të jenë të gjithë në protestë sërish. Kjo është protestë e qytetarëve, e organizuar nga ana dhe është për problemet e qytetarëve”.
Protesta do të nisë në orën 11:00 dhe do të jetë një marshim drejt kryeministrisë.
Sipas organizatorëve, një nga skenarët është përshkallëzimi dhe qëndrimi ulur para kryeministrisë. “Protestat do të vazhdojnë pa ndërprerje”, deklaroi përfaqësuesja. Pavarësisht nga masat e marra nga qeveria për të shmangur abuzimet me çmimet e naftës dhe produkteve të shportës, aktivistët thanë se ato nuk janë të mjaftueshme dhe se nuk ofrojnë garanci që nuk do abuzohet me çmimet e tyre.
Kërkesat e protestuesve
-Heqja e taksës së qarkullimit dhe pezullimi i barrës fiskale mbi çmimin e karburantit
-Pezullimi i TVSh-së për produktet bazë të shportës -Zgjerimi i skemës së kompensimit dhe mbështetjes për fermerët
-Një paketë reale ndihme për pensionistët, invalidët dhe familjet me ndihmë ekonomike për tejkalimin e krizës -Hetim dhe mbikqyrje të koncesioneve dhe operatorëve ekonomikë që ndikojnë arbitrarisht në çmimet në treg, veçanërisht në sektorin e hiodrokarbureve
“Këto propozime dhe masa mbështeten në tre shtylla kryesore: Ulje e barrës fiskale, hetim dhe mbikëqyrje për funksionimin e tregut dhe mbështetje për biznesin dhe shtresat në nevojë. Nëse qeveria është kokëfortë dhe nuk pranon të negociojë, këtë të shtunë, 19 mars, ora 11, të gjithë qytetarët nga e gjithë vendi do të jenë në protestë sërish dhe do të marshojnë nga sheshi “Skënderbej” drejt Kryeministrisë”, - tha grupi iniciator i protestës.