Atentat atentatorëve të dyshuar, mendohet se brenda “BMW”-së së vjedhur ishte Talo Çela, armiku i Nuredin Dumanit
Një fuoristradë në lëvizje është qëlluar në një atentat me armë zjarri, pasditen e djeshme në aksin Peqin-Elbasan, rreth orës 19:30, në Papërr, teksa autorët shënjestër dyshohet se gjithashtu po përgatiteshin të merrnin pjesë po në atentat. Të dhënat e deritanishme flasin për një luftë të përgjakshme dhe hakmarrëse mes grupeve rivale të Talo Çelës dhe Nuredin Dumanit, dikur miq mes tyre dhe prej të paktën 3 vitesh të shpallur në kërkim dhe me një sagë gjaku me të paktën 6 të vrarë dhe disa të plagosur. Në mjetin e bërë shoshë nga plumbat, policia gjeti edhe një bidon benzinë 5 litërsh dhe një armë kallashnikov. Mes palëve në lëvizje me mjete sipas dëshmitarëve ka pasur shkëmbim zjarri. Në mjetin “BMW” të sekuestruar, dyshohet se ka qenë Talo Çela dhe në tjetrin mendohet se ishte grupi i Dumanit. Pas breshërisë, shënjestrat shpëtuan dhe mundën të arratiseshin pa mbërritur uniformat blu. Policia dhe ekspertët gjetën gjurmë të shumta biologjike dhe gishtrinjsh, teksa mjeti rezultoi me targa të vjedhura në Durrës. Dyshimi i hetuesve është se si pala tjetër mësoi informacionet se do të sulmohej, ndaj edhe është ngritur pista e një përgjimi të mundshëm në distancë, në rrjetet sociale, telefon apo dhe ambiental. Ose rrjedhja e informacionit nga vetë brenda grupit. Targat ishin vjedhur që prej vitit të kaluar në qytetin bregdetar. RENEA mori pjesë në operacionin e kërkimeve që po vijon, teksa u konstatuan të paktën 20 plumba automatiku të qitura. Talo Çela bashkë me Nuredin Dumanin, Altin Ndocin, Klevis Allën, Besian Xhixhën dhe Enver Didën akuzohen për vrasjen e dy vëllezërve Besmir dhe Viktor Haxhiajt, si dhe vrasjen e Dorian Shkozës dhe Anxhelo Avdias, të ndodhura në Durrës në vitin 2019, brenda një harku kohor prej dy javësh. Kujtojmë se Çela dhe Dumani kanë qenë pjesë e grabitjes së bujshme të 6 mln eurove në Rinas më 9 prill 2019 dhe ende të kërkuar. Janë futur në konflikt pas humbjes së këtyre parave dhe akuzave ndaj njëri-tjetrit për eleminim me qëllim fshirjen e gjurmëve dhe provave.