KUSH ËSHTË PROKURORJA ELISABETA IMERAJ
•
•
•
•
•
•
•
Elisabeta Imeraj nga shkalla e parë e vettingut u konfirmua në detyrë për të tre kriteret; pasurinë, profesionalizmin dhe pastërtinë e figurës.
Por Komisioneri Publik vendosi ankimimin e konfirmimit në detyrë, kryesisht për vërejtje që kanë të bëjnë me ish-bashkëshortin e saj.
Imeraj paraqiti një kontratë paramartesore të vitit 2007, sipas të cilës, pronat e bashkëshortit, me të cilin u divorcua në vitin 2019, i përkasin atij dhe ajo nuk është përgjegjëse. Një argumentim që Komisioni i Pavarur i Kualifikimit e pranoi si të vlefshëm.
Në përballjen e parë me vettingun, Elisabeta Imeraj u përplas me vëzhguesin ndërkombëtar Theo Jacobs.
Ky i fundit paraqiti si provë një letër “anonime” që i është dërguar ONM-së nga një person i quajtur “Rrahim Shehu”. Vettingu më vonë e provoi se ishte një “person fiktiv”, pra, nuk ekzistonte.
Megjithatë, përballja e “zonjës së hekurt” të akuzës së Tiranës me përfaqësuesit ndërkombëtarë nuk do të mbetej me kaq. Kur letra e “Rrahim Spahiut” doli fiktive, Operacioni Ndërkombëtar i Monitorimit nxori një tjetër akuzë për Elisabeta Imerajn.
Sipas ONM-së, për ish bashkëshortin dhe vëllanë e tij “ka të dhëna se janë dënuar
• për trafikim të qenieve njerëzore në Romë të Italisë në vitin 2002”. Por Imeraj, e divorcuar prej disa vitesh paraqiti vërtetim nga gjykatat italiane se ish-bashkëshorti nuk ka qenë i dënuar në Itali.
Gjykimi i Imerajt në apelin e vetingut do vijojë sot në 12.30. Trupi gjykues pritet të marrë vendim nëse do pranojë provat e reja të paraqitura nga prokurorja. Nëse i pranon, pritet që Komisioneri Publik të rishikojë ose jo ankimimin e tij, bazuar në këto prova. Pas kësaj, trupa do japë vendimin për largimin e Imerajt nga sistemi i drejtësisë, ose mosndryshimin e vendimit të shkallës së parë që e konfirmon atë në detyrë.