Ndahen 4 vazot, kush do bjerë në “grupin e ferrit”? Tre bileta ende në ajër
Shorti i simuluar ditë më parë nga FIFA si provë prodhoi të sigurt një grup zjarri. Kokat e serisë së parë kërkojnë të shmangin Holandën, Gjermaninë dhe nënkampionët e Kroacisë. Do mungojnë shumë yje si; Salah, Ibrahimoviç, ‘garda’ e Italisë, veteranët e Kilit apo talente si Haland. Dje u zbulua edhe top që do luajnë 32 kombëtaret në nëntor-dhjetor, quhet “Al Rihla” (Udhëtari)
Sot pas mesdite (duke nisur nga ora 13:00), nis hedhja e shortit për Botërorin Katar 2022 nga zyrtarët e FIFA-s. Tashmë janë konfirmuar 27 ekipe pjesëmarrëse në fazën finale, të ndara në katër vazo, sipas klasifikimit zyrtar të institucionit të futbollit, në bazë të paraqitjeve respektive.
Kanë mbetur për të prerë biletën 5 ekipe, nga të cilat një e konfirmuar gjatë mëngjesit të sotëm, rreth orës 05:00 në Amerikën e Veriut, kurse 4 të tjerat janë ndeshje ‘ripeshkimi’ apo play-off mes zonave përkatëse. Mbrëmjen e së martës deri mëngjesin e djeshëm, u konfirmuan dy bileta në Europë, me Portugalinë dhe Poloninë, si dhe disa ripeshkime, me Perunë, Australinë, Emiratet Arabe, të cilat pas ndeshjes mes tyre do të përballen për një vend me zonën e CONCACAF. Po kështu u siguruan 5 biletat e Afrikës, me; Senegalin që eleminoi në penallti Egjiptin në një ndeshje plot incidente dhe skandale pas ‘bombardimit’ me lazer të “faraonëve” nga vendasit gjatë gjuajtjeve të penalltive, Maroku që kaloi Kongon me lehtësi, Kameruni që fitoi ndeshjen dramatike në Algjeri në minutën e 124, Gana që mundi Nigerinë, në një fund takimi ku vendasit nigerianë kthyen përmbys stadiumin për eleminimin dhe sulmuan skuadrën, dhe Tunizia që kaloi Malin. Në Amerikën e Jugut, zona COMNEBOL, kanë siguruar biletat Brazili, Argjentina, Ekuadori dhe Uruguaji, kurse në play-off shkoi Peruja, që pret një mes Emirateve dhe Australisë.
Jashtë kanë mbetur dy kombëtare si Kili dhe Kolumbia, që kanë një organikë të pasur futbollistësh dhe që e përjetuan dështimin me emocione negative dhe revoltë.
Në zonën e CONCACAF e ka siguruar biletën Kanadaja dhe pothuajse SHBA, teksa pritet Meksika dhe një play-off nga Kosta Rika. Kjo e fundit luan finalen me Oqeaninë, mes Zelandës apo Ishujve Solo
mon. Në Europë ka mbetur vetëm një vend i lirë, pasi 12 ekipe kombëtare janë tashmë nëpër vazo. Skoci-Ukrainë është shtyrë për shkak të luftës dhe fituesja do ndeshet me Uellsin. Play-off dhe ripeshkimet luhen të gjitha në qershor, por hedhja e shortit do të bëhet sot, ku goglat për ta paluajturat do përmbledhin etiketimin përkatës të fitueses. Në Azi kanë siguruar vendet Irani, Japonia, Arabia Saudite dhe Korea e Jugut. Tashmë 4 vazot janë ndarë; ku në të parën janë 8 ekipet me renditjen më të mirë të FIFA, ku e fundit ishte Portugalia, pas eleminimit të Italisë. Shorti pritet që të rezervojë medoemos një grup ferri për shkak të skemës së tij dhe faktit se në vazon e dytë ka skuadra si Holanda apo Gjermania. Në shortin e simuluar nga FIFA më herët, Anglia u përball në një grup me Gjermaninë dhe ekspertët mendojnë se pavarësisht faktit se ka skuadra si Katari pritës i eventit në vazon e parë, mundësitë që të ketë një grup ferri janë të mëdha.
Tetë muaj nga nisja e eventit, dje është zbuluar edhe topi zyrtar që 32 kombëtaret e futbollit pritet të dhurojnë spektakël në Katar. Topi i ‘Katar 2022’ është një bashkpunim prej muajsh i FIFA-s dhe Adidas. Quhet “Al Rihla”, një fjalë arabe që shpreh konceptin e “udhëtimit”. Kompeticioni nis më 21 nëntor dhe përfundon me 18 dhjetor.