Morën 5 mijë euro për ekstradimin nga Italia, në gjyq avokati dhe punonjësi i Ministrisë së Drejtësisë

Prokuroria e Posaçme mbylli hetimet dhe dërgoi për proces gjyqësor avokatin Lavdosh Spahiu, për akuzën e mashtrimit. Mbrojtësi ligjor akuzohet se i mori në formë pagese 5 mijë euro një familjeje, duke i premtuar ekstradimin nga Italia të të afërmit të tyre, i dënuar në vendin fqinj, me qëllim që ta vuante izolimin në Shqipëri dhe të ishte pranë të afërmve. Gjithashtu i pandehur në proces do të jetë edhe Hamza Tola, punonjës i shërbimit të Ministrisë së Drejtësisë, po për të njëjtën akuzë, si dhe ushtrimi i ndikimit të paligjshëm të personave që ushtrojnë funksione publike.

“Lidhur me përfundimin e hetimeve për procedimin penal nr.179 të vitit 2021, Prokuroria e Posaçme Kundër Korrupsionit dhe Krimit të Organizuar Tiranë, pas përfundimit të hetimeve, ka dërguar për gjykim në Gjykatën e Posaçme të Shkallës së Parë Kundër Korrupsionit dhe Krimit të Organizuar, procedimin penal nr. 179 të vitit 2021, në ngarkim të të pandehurëve:

Lavdosh Shehu, me profesion avokat, i akuzuar për kryerjen e veprës penale “ushtrimi i ndikimit të paligjshëm ndaj personave që ushtrojnë funksione publike”, në bashkëpunim, parashikuar nga neni 245/1, paragrafi i dytë dhe neni 25 i Kodit Penal; Hamza Tola, punonjës shërbimi në Ministrinë e Drejtësisë, i akuzuar për kryerjen e veprës penale “ushtrimi i ndikimit të paligjshëm ndaj personave që ushtrojnë funksione publike”, në bashkëpunim, parashikuar nga neni 245/1, paragrafi i dytë dhe neni 25 i Kodit Penal”, thuhet në njoftimin zyrtar të SPAK për dosjen.

Nga hetimet rezultoi e provuar se Lavdosh Shehu, i ka kërkuar familjes së shtetasit F.H., një shumë prej 12000 euro, duke premtuar dhe siguruar se ka aftësinë për të ushtruar ndikim në funksionarë të Ministrisë së Drejtësisë, për kryerjen e transferimit nga shteti italian, për të vuajtur dënimin në Shqipëri. “Këtë ndikim në funksionarët e

Ministrisë së Drejtësisë, shtetasi Lavdosh Shehu, do ta realizonte në bashkëpunim me shtetasin Hamza Tola, punonjës shërbimi në këtë Ministri. Në vijim, shtetasi Lavdosh Shehu, ka arritur të marrë nga familjarët e të dënuarit F.H. vetëm një shumë prej 5 000 (pesë mijë) euro”, theksohet në dosjen penale. Denoncimi është bërë nga vetë familjarët e të dënuarit shqiptar në vendin fqinj, teksa të pandehurit e mohuan akuzën e ngritur. Hetimet e kësaj ngjarje, janë bërë e mundur, falë edhe ndihmës të dhënë nga emisioni investigativ televiz “Stop” i Tv Klan”, thuhet në njoftim.