Gjykata i heq ‘njollën’ Armand Dukës, por akuzat mbeten. Prokuroria do apelojë
Gjykata e Tiranës i heq pezullimin presidentit të vetëzgjedhur ilegalisht të FSHF-së, Armand Duka, por i mbeten dy akuzat penale të falsifikimit dhe shpërdorimit të detyrës. Duka tashmë mund ta ushtrojë me kompetencë të plotë detyrën si president i FSHF-së, teksa do të verifikohen vendimet që ka marrë apo firmosur gjatë kësaj kohe, të cilat do konsiderohen jo vetëm nul, por edhe abuzim me detyrën, që mund t’i shtojnë veprat penale nga ana e Prokurorisë..Gjykata e ka hequr masën e pezullimit nga detyra edhe për Sekretarin e Përgjithshëm të FSHF, Ilir Shulku. Të dy do të hetohen në gjendje të lirë nga Prokuroria e Tiranës, për akuzat e “shpërdorimit të detyrës” dhe “falsifikimit të dokumenteve”. Por nuk ka pasur të njëjtin fat sekretari tjetër Ardian Haçi, që do të mbetet në vijim i pezulluar.
Prokuroria njoftoi se do ta apelojë vendimin. Haçi, sekretar i Shoqatës Rajonale Tirana, akuzohet për disa vepra penale gjatë ushtrimit të detyrës si “shpërdorim detyre” dhe “falsifikim”. Më 18 mars, Apeli la në fuqi vendimin e Gjykatës së Tiranës për pezullimin e Armando Dukës dhe Ilir Shulkut, pasi janë në hetim, për manipulimin e zgjedhjeve te shoqata e Tiranës, ku fitues u shpall përkohësisht Krenar Alihmehmeti. Më vonë, Gjykata njohu si kryetar Eduart Prodanin, pas padisë që bëri kryebashkiaku Erion Veliaj. Më tej Duka u dënua me 700 mijë lekë gjobë dhe pezullim nga funksionet, teksa u mor edhe nën akuzë nga Prokuroria për dy vepra penale. Gjykata e paralajmëroi Dukë se rrezikonte një dënim deri në 3 vite izolim.
Armand Duka u rikonfirmua President i Federatës në zgjedhjet e mbajtura nga Asambleja e Përgjithshme më 15 mars, pas anulimit të datës së paracaktuar të 2 marsit, si pasojë e vendimit të drejtësisë. Pa asnjë surprizë, ai arriti që të siguronte 37 vota nga 43 votues të vlefshëm që morën pjesë në Asamble, duke vijuar drejtimin e institucionit më të rëndësishëm të Futbollit në vend edhe për 4 vitet e ardhshme. Aktualisht Prokuroria nuk është shprehur ende për fazën hetimore dhe dosjen ndaj kreut të FSHF-së, por ka gjasa që procesi të vijojë në gjendje të lirë deri në fund dhe Duka do të jetë në detyrë i vetëzgjedhur derisa të shprehet verdikti i formës së prerë të gjykatës.