Kushtetuesja rikthen në Gjykatën e Lartë rekursin e Gentian Manajt
Shkalla më e lartë e gjyqësorit vlerësoi se Supremja nuk duhet ta kishte refuzuar rekursin e të cilësuarit si kreu i kartelit shqipfolës të kokainës nga Amerika Latine për në Europë. Gjykata e Tiranës dhe Apeli miratuan ekstradimin e tij për në Itali, por tashmë ka dhe një të drejtë juridike për shqyrtim në të Lartën. Italianët e cilësonin në përgjime si “Bahamas”, avokati pretendon se s’ka prova dhe se klienti nuk ishte njoftuar
Gjykata Kushtetuese i jep shpresë juridike të cilësuarit si kreu i kartelit shqipfolës të drogës “Los Blancos”, Gentjan Manaj. Bëhet fjalë për një rekurs të të dyshuarit në Gjykatën e Lartë, i cili kërkonte heqjen e ekstradimit për në Itali, vendim i marrë nga gjykatat e mëparshme të Tiranës dhe më tej e lënë në fuqi nga Apeli. Supremja nuk e kishte pranuar rekursin me pretendimin se “Manaj nuk plotëson kriteret formale, pasi është ushtruar nga mbrojtësi që nuk e kishte tagrin për ta ushtruar një të drejtë të tillë’. Por në vendimin e zbardhur të
Kushtetueses thuhet se: “Vendimi i Kolegjit Penal për mospranimin e rekursit, i kundërshtuar nga kërkuesi, është rrjedhojë e një tërësie shkaqesh që lidhen me veprimet dhe mosveprimet e organeve shtetërore, duke nisur me mosveprimet e IEVP-së FushëKrujë, e cila duhej t`i përcillte një kopje të aktit të përfaqësimit organit procedues (prokurorisë ose gjykatës) dhe më pas të gjykatave, që nuk kanë hetuar dhe verifikuar në mënyrën e duhur përfaqësimin dhe tagrat e mbrojtësit, por edhe me sjelljen e vetë mbrojtësit të kërkuesit”.
Kushtetuesja vendosi dërgimin e çështjes për rishqyrtim në Gjykatën e Lartë, ku Manaj të paktën do ketë mundësinë që ky rekurs t’i shqyrtohet dhe pala mbrojtëse të dëgjohet në argumentet që disponon. Fillimisht ekstradimin drejt Italisë u mor nga Gjykata e Tiranës, vendim që u la në fuqi nga Apeli. Pas kësaj u bë rekurs në Gjykatë të Lartë dhe nuk u pranua. Manaj nuk u tërhoq, por e dërgoi çështjen në Kushtetuesen, duke pretenduar antikushtetueshmërinë dhe se ai nuk ishte identifikuar në lidhje me veprën penale. Sipas mbrotjësit të Manajt në atë kohë, prokuroria ka paraqitur një profil kriptotelefonik me pseudonimin “Bahamas”, por nuk e ka shpjeguar koincidencën me Gentianin.
35-vjeçari i njohur edhe me emrin Myzafer dhe që akuzohet se ka drejtuar një kartel shqiptar që trafikonte drogë nga Amerika Latinë në Europë, në 15 shtator të vitit 2020 u arrestua në Shqipëri si pjesë e operacionit “Los Blancos”. Ai u prangos pas një urdhri ndërkombëtar nga Interpol Roma në Itali, pasi gjykata e Firences kishte caktuar ndaj tij masën e sigurisë “arrest me burg”. Drejtësia italiane e akuzon Manaj për “organizatë kriminale” dhe “trafik ndërkombëtar droge”.